UQHAKAMBISA IZINYUNYANA NGEKA-MATRIC
MTHOBISI SITHOLE
UQHAKAMBISE izinyunyana zothisha zakwazulu-natal, emangazwa wukwenyuka ngamandla kwesifundazwe ngemiphumela yaso kamatikuletsheni, ungqongqoshe wezemfundo eyisisekelo, unkk Angie Motshekga.
Ekhuluma ethekwini, e-inkosi Albert Luthuli Convention Centre (ICC), izolo ngolwesihlanu, uthi ukukhuthalela kwazo imfundo kuthele izithelo ezinhle esifundazweni. Nangolwesine ebusuku ekhuluma ngemiphumela kazwelonke epitoli, uthe umangalile ngokwenza kahle kangaka kwalesi sifundazwe.
Ikwazulu-natal, ilale isibili kuzwelonke ngokuphasa kahle kwabafundi bayo. Ungqongqoshe uthe umangele ngoba ubengakulindele lokhu.
Lesi sifundazwe sithole u-86.4%, senyuka ngo-3.4% silandela ifree State eqhwakele ngo-89.0% okuyiyona (ifree State) eshaye zonke izifundazwe. Isithathu kube yisifundazwe igauteng ngo-85.4%.
Imiphumela kamatikuletsheni kuzwelonke yakulo nyaka, kube wu-82.9% isuka ku-80.1% wangonyaka odlule.
Lokhu kusho ukuthi ikhuphuke ngo-2.8% kuzwelonke. Ungqongqoshe wezemfundo esifundazweni, unkk Mbali Frazer uthi kubafundi ababhalile abalinganiselwa ku-167 000, baphasile abawu-136 000.
Utshele abezindaba ukuthi lesi sifundazwe yisona esenze umehluko omkhulu nasekuphakamiseni ukwenza kahle kukazwelonke. Uthi izikole ezithole u-100%, zinyuke zafika ku-246, zisuka ku-214 wanyakenye, kanti nezithole ngaphansi kuka-40% zisuke ku-29, zafinyelela ku-18.
“Konke lokho siyaziqhenya ngakho ngoba kusho umsebenzi omuhle esiwenzile,” kusho unkk Frazer.
Kwizifunda eziwu-10 ezihambe phambili kuzwelonke, EKZN kungene ilembe, Ugu, izululand, kanti umkhanyakude ulale isine kuzwelonke, uqhwakele ngokwesifundazwe kuzwelonke.
Unkk Frazer uthi zonke izifunda kasikho esiphase ngaphansi kuka-80%. Umkhanyakude uqhwakele ngo-90%, kwalandela Ugu, oluthole u-89.5%, ilembe u-88.5%, Zululand u-87.16%, Amajuba u-87.0%, umzinyathi u-86.5%, umlazi u-86.1%, ipinetown yona kube wu85.06%, iking Cetshwayo u-83.4% kube wuthukela u-82.3%.
Unkk Frazer uthi abafundi abaphase ngezinga lebachelor basuke ku-61 000 ngonyaka ka-2001, nyakenye kwaba abawu69 000 kanti kulo nyaka bawu-72 000
Bheka nasekhasini 14. mthobisis@ilanganews.co.za