Siphase ngo-95.1% isikole esalahlekelwa abafundi abawu-6 engozini nyakenye
Uthishanhloko wasemchitheki ubonge ukwesekwa, wathi wabahlukumeza lo mshophi
UBONGE ukwesekwa kwabafundi esikhathini esinzima uthishanhloko wase Mchitheki High School, Kwanongoma, kulandela imiphumela emihle yalesi sikole, ngemuva kokwehlelwa yingozi eyadlula ne-miphefumulo yabafundi abayisithupha ngonyaka ophelile.
Umnu Xolani Mthethwa onguthishanhloko, utshele leli phephandaba ukuthi ngaphambi kokwehla kwale ngozi bebevele bevivela ukuthola imphumela emihle. Uthi imiphumela etholwe yisikole iyabathokozisa bengothisha, njengoba ikhombise ukukhuphuka kuneka-2022.
“Siyaziqhenya ngabafundi bethu ba-2023, abakwaze ukuyibamba phezu kwesehlo esibuhlungu esisehlele ngonyaka ophelile. Ngiyakholwa ukuthi ukube ingozi eyadlula nozakwabo ayenzekanga besiyobuya nawo u-100%. Ngemuva kokuthola u-87,8% ngo-2022, ngacela ozakwethu nabafundi ukuthi kunyaka ka-2023 bakhuphule nje noma ingo-10%. Kucishe kwenzeka ke njengoba sithole u95,1%,” kuchaza umthethwa.
Ubike ukuthi ngemuva kokwehlelwa yilo mshophi owadlula nabafundi, abazali, uhulumeni, nezinhlaka ezizimele zabeseka kakhulu, ziqinisekisa ukuthi imiphumela yabafundi bakamatikuletsheni ayiphazamiseki. Uthi yize kwakuyisikhathi esinzima, bakwazi ukudlula kuso.
“Ngemuva kokwehla kwengozi abafundi bebevakashelwa ngosonhlalakahle abebenza isiqiniseko sokuthi akuphazamiseki ukufunda ngoba isimo esinjengalesi siyawuhlukumeza umqondo. Ukwesekwa esikutholile kube kuningi kakhulu njengoba kugcine kuphume imiphumela emihle kangaka, nengikholwa ukuthi abanye bebengayilindele,” esho.
Uncome othisha ngamaqhinga abebewasebenzisa, nakholwa ukuthi asebenzile. Uthe nakuba kungekho okusha kulamaqhinga, kodwa akhombise ukuthuthukisa isibalo sabafundi abenze kahle ngonyaka ophelile. Uthe okubalulekile kubo wukuthi bakhiqize abafundi abasezingeni, nabazothola izikhala ezikhungweni zemfundo ephakeme.
“Thina lapha ekhaya kasivali uma kungamaholide, futhi abafundi abenze kahle sibakomelisa kuwo wonke amathemu onyaka. Ngiyakholwa ukuthi lokho kuyabagqugquzela ukuthi bafise ukunyusa amasokisi.
“Kulo nyaka nje abafundi baningi kakhulu abaphase ngo-bachelor, kwase kuba nababili abaphase ngamalengiso, oyedwa wabo uthole o-a bawu-7, lo omunye wathola abawu-6. Okunye engingathi kusizile ekutholeni le miphumela wukuthi ngesikhathi sekusondele izinsuku zokubhala, iningi labafundi nothisha bebehlala lapha emagcekeni esikole, bebuyekeza umsebenzi abawufundile,” esho.
Kuzokhumbuleka ukuthi ngoncwaba (August) wonyaka odlule kwagingqika ibhasi eyayithwele abafundi bebanga le-10 no-11 bakulesi sikole ngasesiqiwini ehluhluwe, neyadlula nemiphefumulo yabafundi abawu-6, kwalimala abawu-35.
Kwavezwa ukuthi ibhasi yagingqika isendleleni ihambisa abafundi ethekwini, beyofunda. Imibiko yaveza ukuthi kusolwa ukuthi umshayeli wayo wehluleka ukuyilawula ngesikhathi ijika elinye lamajika akule ndawo.