AWEZEPOLITIKI KWAZULU-NATAL AHALALISE ABUYA NGANENO
AHALALISELE abafundi abaphase umatikuletsheni aphinde abuyela nganeno amaqembu ezepolitiki aphikisayo Kwazulu Natal, kulandela ukuthi lesi sifundazwe senze kahle kule miphumela njengoba sibe ngesesibili ngokuphasa kahle eningizimu Afrika.
Kule miphumela kamatikuletsheni ekhishwe ngungqongqoshe wemfundo eyisisekelo unkk Angie Motshekga ngolwesine, ikwazulu-natal ikhombise ukunyuka nangamaphesenti abafundi abaphasile uma kuqhathaniswa nangonyaka owedlule.
Unkk Thembeni Kamadlopha Mthethwa okhulumela ezemfundo kwi-ifp esishayamthetho sakwazulu-natal, uthe uyabahalalisela abafundi abenze kahle, kodwa akajabule ngokugcwele ngayo.
“Siyababongela impela abafundi abaphumelele, benze umsebenzi oncomekayo. Kodwa kuyakhathaza ukuthi isifundazwe sinesibalo esiphezulu sabafundi okuthiwa bakopelile. Ngakho akulula ukuthi sijabulele le miphumela ngokugcwele ekubeni kusenemibiko ngezinga eliphezulu lokukopela,” kusho unkk Kamadlopha Mthethwa.
Elinye iqembu elihalalise laphinde labuyela nganeno kube yi-da, yona ethe le miphumela ayivezi isithombe esiyikho ngezinga lezemfundo kulesi sifundazwe.
“Sibongela bonke abafundi abenze kahle ngokuphumelela, kanjalo othisha nabazali abadlale indima emqoka ekuphumeleleni kwezingane.
“Imiphumela ekhishwe ungqongqoshe, ikhombisa ukuthi lesi sifundazwe sinyuke ngamaphesenti awu-3.3% uma kuqhathaniswa nonyaka ofile. Nakuba kunjalo kodwa siyida asikholwa ukuthi le miphumela ikhombisa okuyikho ngemfundo yesifundazwe,” kusho udkt Imran
Keeka okhulumela ezemfundo kwi-da esishayamthetho sakwazulu-natal.
Uthe okubakhathazayo njengeqembu wukushiya kwabafundi abaningi kusukela kwa-grade 10. Uthe lesi sibalo sabafundi abebenza umatikuletsheni siyakhathaza njengoba uma ubheka isibalo sabagcine besishiya isikole bengafinyelelanga kuleli banga, siphezulu.
Ngakolunye uhlangothi i-action SA Kwazulu-natal ihalalisele laba bafundi ngaphandle kwemibandela njengoba ibancome ngokwenza kahle nangokuzimisela ezikhathini ebezinzima zokufunda.
Iphinde yakhuthaza labo abangenzanga kahle ukuthi bangadikibali, bacabange ukuthi sekuphelile. * Bheka nasekhasini 14.