Selukhethiwe usuku lwesinqumo senkantolo kwelokubulawa kukanjiniyela
KULINDELEKE ukuthi libuyele enkantolo ngasekuqaleni kukambasa (April) nonyaka sekuyophuma isinqumo icala elibhekene nomhlengikazi, unkz Nompumelelo Goncalves (osesithombeni), osolwa ngokubulala umyeni wakhe umnu Nkosi Langa, owayengunjiniyela kwatransnet. Kuthiwa leli cala walenza ehlangene nomfowabo umnu Nkosinathi Zungu, ngo2020.
Ngolwesine inkantolo enkulu yasethekwini ilalele izethulo zokugcina zombuso nabameli babamangalelwa.
Ezethulweni zombuso umshushisi ukrishen Shah, ucele inkantolo ukuba ibalahle ngamacala abammangalelwa ngoba ubufakazi obethuliwe buveza ngokusobala ukuthi bobabili banecala.
Utshele inkantolo ukuthi ubufakazi obunamandla nobuqukethe ubuqiniso bokwenzeka kusukela kwakhiwa itulo kwaze kwaba wusuku okwabulawa ngalo umufi yilobo benkabi eseyagwetshwa yaphenduka ufakazi wombuso ujames “Ramaphosa” Mashudu.
Uveze ukuthi lokho ukusho ngoba uzungu ongummangalelwa wokuqala akabuphikisanga ubufakazi bukaramaphosa, futhi ngesikhathi emphonsa imibuzo wazivumela ukuthi unecala, kodwa akalikhiphanga ngembaba, nathe ukholwa wukuthi akakwenzanga lokho ngoba kwakuzofana “nokudayisa” udadewabo (unompumelelo).
Uthe inkantolo kumele ingamdedeli unkz Goncalves ngoba uziveze njengomuntu ongathembekile ngesikhathi ethula ubufakazi bakhe.
Ubike ukuthi umbuso ukwazile ukuveza ukuthi wayeyingxenye yokwakhiwa kwetulo, nokubulawa komyeni wakhe, wazama ukulahlekisa umkhondo ngokuvula icala lomuntu olahlekile ekubeni elazi kahle iqiniso.
Ummeli kagoncalves, umnu Siphelele Zwane, utshele inkantolo ukuthi nakuba ubufakazi bombuso “buhlanzekile” kodwa uma inkantolo ikhipha isinqumo kumele icubu-ngulisise oku-thile ebufa-kazini.
Uveze ukuthi kumele icubungulisise ubufakazi obethulwa nguramaphosa.
Uthe uramaphosa wazivumela ngokwakhe ukuthi ungumuntu ongathembekile nothatha izinto ngenhliziyo. Uthe ngesikhathi esenkantolo enkulu yasemgungundlovu, waveza ukuthi wayebukele ngesikhathi uzungu ebulala umufi, kodwa uma esethula ubufakazi phambi kwenkantolo, wathi umufi bambulala nozungu. Uqhube wathi kwathi uma ebuzwa ngalokhu, wathi akusho emgungundlovu kwakungenxa yokubambela uzungu inhliziyo. Uphinde waveza ukuthi ukholwa wukuthi uramaphosa wayengeke avume ukubulala umufi engakhokhelwe ngisho ingxenye yemali ayeyibizile, nakuchaze ngokuthi kukhomba ngokusobala ukuthi sasingekho isivumelwano sokukhokhelana phakathi kukaramaphosa nekilayenti lakhe.
Ucele ukuthi inkantolo iqinisekise ukuthi ikilayenti lakhe liyathinteka ngempela yini kuleli cala ngaphambi kokukhipha isinqumo.
Ulanga wathunjwa esemzini wakhe epinetown ngomandulo (September) ka-2020, isidumbu sakhe satholakala sesonakele Ozwathini, endwendwe. Kwabe sekuboshwa uramaphosa, nowavuma icala wagwetshwa iminyaka ewu-20, waphenduka ufakazi wombuso.