IYANGETHUSA EYOKUTHI CHITHI SAKA KWEZANGOMA
MHLELI: Cishe izinkalo zonke zezwe abantu sebeyizangoma, izinyanga nabathandazi. Uma uhamba edolobheni ubona iningi lifake iziphandla, ubuhlalu ezandleni nasezinyaweni, amabhayi nokunye ukukhombisa ukuthi basebenza umsebenzi wabaleleyo.
Inkinga iningi labo yizingane ezifunda isikole, omakoti, obhuti kanti phambilini izinyanga nezangoma bekujwayele ukuthi kube ngabantu abadala, asebevuthiwe nasebengwevu. Angiyazi le nto esiyenzeka namuhla. Futhi bebengebaningi. Manje bagcwele izwe lonke.
Inkinga iningi labo bayasebenza bangothisha, amanesi, amaphoyisa, abanye bayafunda, okwenza bagxile kwabakwenzayo kugcine kuphelile ngomsebenzi wedlozi. Kwenzeka kanjani ukuthi umuntu anikwe yidlozi umsebenzi wokuphilisa abantu, aphinde asebenze engxenye?
Abanye kabasebenzi kwasanhlobo, kodwa bafake iziphandla, ubuhlalu namabhayi okukhombisa ukuthi bangabelaphi bendabuko.
Abanye babuye badlwengule wona amathwasa. Khona nje osanda kuboshwa kwelinye ilokishi kwazungeze itheku, owadlwengula ithwasa waze walikhulelisa.
Kubuhlungu ukuthi umuntu ahambe ayoqeqeshelwa ubungoma, kukhokhwe imali eshisiwe athi ngisho eseqedile ukuthwasa kuchithwe enye imali, kubulawe inqwaba yezimbuzi nenkomo ukuze aphothule aphume entwasweni.
Khona lapho ingxenye enkulu yokudla, ugologo nokunye kuthwalwe yizangoma zihambe nakho. Ekugcineni kungasebenzeki kulo obeyoqeqeshwa.
Ngiyacela kokhokhovula balo msebenzi wamathongo, osolwazi Bhedlindaba VVO Mkhize nomnu Sazi Mhlongo ke besikhanyisele ukuthi kusahamba ngakho na.
Kwamthethwa sikhule kunokhokhovula bezinyanga abaziwayo, oshebelezi Mchunu, enhla nenhlangeni, okati “Katelimnyama” Jangaza phezu kwemvamanzi, omadwadla Mlondo phezu kohlezane nenduna yasemabhudle (Ematholeni) umzikawukho “Qondisa” Mthethwa. Abantu ababenesithunzi bengabhekeki.
Kuthiwa babekunika “induku” leyo oze ngayo, inkokhelo bengayidingi, bayidinge ususindile. Usinde ngempela futhi.
Angilwi nabelaphi bakithi bendabuko kodwa indlela asebethe chithi saka ngayo naneminyaka yabo, iyethusa.