USHALULILE UZIMISELE UKUBUYISA ISITHUNZI SAKHE NGOKUBUKISA NGEBAFANA
UFUNA ukubuyisa isithunzi sakhe ngeqembu lesizwe lakuleli ibafana Bafana umgadli wenamibia nemamelodi Sundowns emdlalweni we-africa Cup of Nations (Afcon) eqhubeka e-ivory Coast.
Inamibia izobhekana nebafana kowe-afcon kusasa ngesonto ngo-20h00.
Lo mdlalo ubhekwe ngabomvu ngabathandi bebhola njengoba ungase ucacise ngekusasa lala makilabhu kulo mqhudelwano.
Ibafana kufanele iwunqobe lo mdlalo kumnyama kubomvu ngoba uma ingehlulwa kuyobe kusho ukuthi kufanele ibambe ibhanoyi elibuyayo.
Kanti inamibia yona uma inganqoba iyozibeka ethubeni elihle lokudlulela esigabeni somkhumulajezi.
Inamibia iyivule kahle le midlalo iguqisa ngo-1-0 wegoli likadeon Hotto itunisia, kanti ibafana yona ishaye udaka ihlulwa ngo-2-0 yimali.
Upeter Shalulile ongumgadli wenamibia uthi ufuna ukugeza igama lakhe ngebafana kulo mqhudelwano.
Kuzokhumbuleka ukuthi emdlalweni wetunisia, ushalulile ushwebe inqwaba yamathuba alula avamise ukuwashaya kalula uma ekwisundowns.
“Umdlalo wethu nebafana uzoba nzima kodwa futhi uzoba mnandi. Okuhle ngawo wukuthi siyazana kwazise abadlali bethu abaningi badlala eningizimu Afrika sijwayelene nabo. Silindele umdlalo oseqophelweni eliphezulu kubona kwazise kufanele bawunqobe kumnyama kubomvu kanti nathi ngokunjalo kuyaphoqa ukuthi siwunqobe.
“Sifuna ukuqopha umlando njengoba singakaze sidlulele emzuliswaneni olandelayo. Nami ngokunjalo ngifuna ukugeza igama lami ngishwebe amathuba alula emdlalweni wetunisia. Kuzofanele ngikore kulo mdlalo webafana ukuze ngibuyelwe wukuzethemba,” kusho ushalulile.
Uthi kukhulu abakufunde emdlalweni wetunisia.
“Umdlalo wetunisia usiqinise ukhakhayi wenze abantu bavula amehlo kwazise bebengasiniki lutho. Ubunzima lo mdlalo bawatholile amathuba sasizwa ngunozinti wethu. Kodwa-ke njengoba siya kulo mdlalo webafana ngimtshelile umqeqeshi ukuthi ngizokuqinisekisa kulokhu ukuthi ngiba bukhali phambi kwamapali. Noma kanjani ngizokwenza kangcono,” kusho ushalulile.*