Kugujwa ukunqoba kweningizimu Afrika kwi-icj
UKUNQOBA kweningizimu Afrika enkantolo yamazwe yezobulungiswa, ebizwa ngokuthi yiinternational Court of Justice (ICJ) ehague, enetherlands, kulethe injabulo kuleli nakwamanye amazwe eseka ipalestine.
Kwisinqumo esethulwe yijaji ujoan Donoghue ngolwesihlanu, I-ICJ ivune iningizimu Afrika kwisicelo sayo sokuba inqume ngezinyathelo zesikhashana okumele zithathwe yi-israel ukuze kuvikelwe abantu basepalestine, empini ephakathi kwe-israel negaza.
I-ICJ ithe i-israel kumele ithathe izinyathelo zokugwema izenzo zokuqothwa kwabantu egaza.
Le nkantolo iyalele i-israel ukuba iqinisekise ngokushesha ukuthi amasosha ayo kawabulali abantu basepalestine, futhi kawabalimazi ngokomzimba nangokwengqondo.
Nakuba inkantolo ingasemukelanga isicelo seningizimu Afrika sokuba ikhiphe umyalelo wokuba i-israel ibeke phansi izikhali ngokushesha, kodwa le nkantolo ikubeke kwacaca ukuthi i-israel kumele iyeke ukubulala, ukulimaza, nokucekela phansi impilo yabantu basepalestine.
Futhi inkantolo iyalele nokuthi i-israel kumele yenze isiqiniseko sokuthi akuphazamiseki ukuthunyelwa egaza kosizo oluqhamuka kwamanye amazwe.
Emasontweni ambalwa edlule I-ICJ ilalele izethulo zeningizimu Afrika ekholwa wukuthi okwenziwa yi-israel egaza kuwukuqotha ngenhloso yokuqeda nya ngabantu basepalestine abahlala egaza.
Kulezo zethulo zayo iningizimu Afrika inxuse le nkantolo ukuba ikhiphe umyalele ophuthumayo izinsolo zeningizimu Afrika zokuthi ekwenzayo kuwukuqotha abantu basepalestine ngenhloso yokubaqeda nya, yathi yona ekwenzayo wukuzivikela ngoba yihamas yasegaza eyaqala ukuhlasela kwa-israel mhla zingu7 kumfumfu (October) ngonyaka odlule.
I-israel yaphinde yanxusa I-ICJ ukuba isichithe isimangalo seningizimu Afrika, futhi isikhiphe nasohlwini lwamacala asenkantolo lesi simangalo.
Nokho I-ICJ isichithile leso sicelo se-israel sokuba leli cala lichithwe futhi likhishwe ohlwini lwamacala azohlalelwa yile nkantolo.