ISIGUNGU ESIPHEZULU SE-ANC SIDINGIDA NGEKAZUMA NE-MK
INDABA kamnu Jacob Zuma owayengumengameli wezwe nomengameli WE-ANC, neqembu elisha umkhonto wesizwe (MK) asehamba nalo manje futhi alikhankaselayo njengoba kuyiwa okhethweni lukazwelonke nezifundazwe, ingenye yezinto ezizodingidwa emhlanganweni wesigungu esiphezulu SE-ANC.
Lesi sigungu sihlangene kule mpelasonto ebirchwood Hotel, Ekurhuleni. Ngaphandle kwayo le ndaba yemk nozuma, kunezinto eziningi ezahlu-kene ezizodingidwa ezithinta inhlangano kanye nezithinta izwe.
Emva kwalo mhlangano wesigungu esiphezulu oqale ngolwesihlanu, kuzobe sekungena ilekgotla YE-ANC ngesonto, yona ezogoqwa ngomsombuluko.
Esithangamini sabezindaba ngolwesihlanu ekuseni okhulumela I-ANC unkk Mahlengi Bhengumotsiri uthe kuningi okuzodingidwa kulo mhlangano.
Ubale ukuthi kuzodingidwa ngesinqumo senkantolo yamazwe yezobulungiswa, ebizwa ngokuthi yiinternational Court of Justice (ICJ), esimayelana nesimangalo seningizimu Afrika esithinta ukubulawa kwabantu epalestine. Ubale nokuthi kuzodingidwa nangesimo sepolitiki ezweni, kuphinde futhi kubhekwe umbiko wekhomishini YE-ANC ebizwa nge-integrity Commission, eqondene nendlela yokuziphatha kwamalungu enhlangano.
“Ilekgotla izobhekana nezindaba ezibalulekile ezifana nokuhanjiswa kwezidingo (service delivery), indima yengqalasizinda yezokuthutha ekukhuleni nasekuthuthukisweni (kwezwe), ezohulumeni basekhaya kanye nezidingo eziyisisekelo, uhlaka lwethu lomqulu wokhetho luka-2024, kanye nohlelo lwethu lonke lokusebenza onyakeni u-2024,” kusho unkk Bhengu-motsiri.
Indaba yokusungulwa kwemk ingenye yezinto eziqukethwe wumbiko wenational Working Committee (NWC) owethulwe kulo mhlangano.
Nakuba unkk Bhengu-motsiri ekuqinisekisile KWISABC ukuthi le ndaba iyabandakanyeka kulo mbiko owethulwa ngunobhala jikelele WEANC egameni lalesi sigungu, kodwa uthe akukhona ukuthi yiyona ndaba enkulu okuzogxilwa kuyona.
Uthe ziningi izinto ezisemqoka ezizodingidwa.