Amakhosikazi osaziwayo azokhuluma ngezinkinga zokuba ngabafelokazi
Inkosikazi KAHHP yafaka abasemzini ezinkantolo ngenxa yomdonsiswano
LUZOKHONJISWA kwishowmax, uhlelo olukhuluma ngabesifazane abashonelwe ngabayeni babo abebesemkhakheni wezikaqedisizungu, iwidows Unveiled. Lolu hlelo oluzoqala ngomhla ka-12 kunhlolanja (February), luzolandela impilo yabesifazane abahlanu abebeshade nosaziwayo, ukudlula kwabo emhlabeni okushiye abaningi bekhala.
Uhlelo lolu kaluzokubheka nje ukuthi basale bephila kanjani ngemuva kokushona kwabayeni, luzogxila nasezingqinambeni ababhekane nazo sebeshonelwe.
Ulerato Singadi owayeshade nomculi wehip Hop, ujabulani “HHP” Tsambo, kuzokhumbuleka ukuthi emngcwabeni womyeni wakhe, wayefana nesivakashi njengoba umndeni KAHHP wawumlwisa, uthi akasiye unkosikazi, bebengashadile.
U-HHP udlule emhlabeni eseke waya kalerato eyolobola, kanti nomshado wesintu bawenza kodwa umndeni KAHHP wawumphika, uthi akanalo ilungelo emafeni akhe ngoba bebengasathandani futhi babengakaze bashade. Waze wakhishwa nasendlini ababehlala kuyona, okwaphoqa le ntokazi ukuthi ibafake ezinkantolo abasemzini wayo, nokuyilapho eyaliwina khona icala. Inkosikazi yomculi we-kwaito umandoza ogama lakhe langempela ngumduduzi Tshabalala, umpho, ungomunye wabazobonakala kulolu hlelo kanjalo nosikelelwa Ngubane owayeshade nomlingisi owayengaconsi, owayengowokuzalwa emnambithi, umenzi Ngubane. Ngaphambi kokushona kukamenzi, wagula isikhathi eside, ehlushwa yisifo sezinso.
Kulolu hlelo kuzobhekwa izinkinga ezahlukene inkosikazi yakhe eyabhekana nazo engasekho.
Usomabhizinisi ulerato Maphatsoe owayeshade nowayengusekela-ngqongqoshe emnyangweni wokuvikelwa kwezwe umnu Kebby Maphatsoe naye uzobonakala kulolu hlelo kanjalo nosomabhizinisi ufundiswa Molefe owayeshade nosomabhizinisi ujohn Molefe.
“Njengomfelokazi osemncane ngibonile ukuthi ziningi kangakanani izinkinga abafelokazi ababhekana nazo,” kusho usengadi.
Uthi okunye akufundile wukuthi uma ungumfelokazi, kakulindelekile ukuthi ukwazi ukuzikhulumela nokulwela okungokwakho ngoba lokho kukwenza ubonakale njengomuntu ongahloniphi nongalandeli isintu.
“Kawukwazi ngisho ukukhuluma ngobuhlungu osuke ubhekene nabo. Kusona leso sikhathi ku-lindeleke ukuthi ugqoke inzilo, abantu ohlangana nabo nosondelene nabo bakuxwaye, abanye kube sengathi bayakudabukela,” kuqhuba yena.
Umpho uthi ukhethe ukuba yingxenye yalolu hlelo ukukhombisa ababhekene nalesi simo njengamanje ukuthi bangakwazi ukuqala kabusha impilo, futhi baqhubeke nokuphila.