Ikhomishana yamalungelo kumasipala wetheku
Ukaunda uthi bazokwengeza amaloli, kuqashwe abashayeli basebenze ngokugcwele
IMEYA yetheku umnu Mxolisi Kaunda iphumele obala ngokungenelela kwekhomishana yamalungelo abantu (Human Rights Commission) ethekwini, kulandela izikhalo ngodaba oluthinta ukusatshalaliswa kwamanzi. Ukaunda uphawula ngalokhu nje, ngeledlule iqembu eliphikisayo kulo masipala, libhalele le khomishana likhala ngokuthi lo masipala unyathela amalungelo abantu ngodaba lwamanzi njengoba sekukhalwe kakhulu ngawo ezindaweni ezahlukene ezingaphansi kwawo.
Kwezinye izindawo kuvele ukuthi sekuphele cishe izinyanga ezintathu amanzi bengenawo, kanti kwezinye ayafika ahambe kuphele izinsuku bengenawo.
Lokhu kugcine kuholela ekutheni leli qembu libhalele le khomishana ngenhloso yokufaka isimangalo.
Ukaunda ekhuluma nabezindaba ngolwesine, uveze ukuthi ikhomishana yamalungelo abantu sekunesikhathi ingenelelile kulolu daba njengoba kunemihlangano ebanjwayo masonto onke nezikhulu zayo ngenhloso yokuthola isixazululo.
“Sisebenza ngokubambisana nekhomishana yamalungelo abantu. Kakuqali manje njengoba seyibhalelwe elinye iqembu.
“Kayisebenzi ngepolitiki, kodwa isebenza ngendlela yayo, futhi ehambisana nenqubomgomo ebekelwe yona,” kuchaza ukaunda.
Uthe le khomishana isebenza ngokubambisana nezikhulu zikamasipala ngenhloso yokuthola umnyombo wenkinga nezixazululo.
“Kayiqali manje, sekuphele amasonto befika bebambe imihlangano, ngakho ngeke siphawule ngabanye abantu abangazi lutho ngokuphatha umasipala omkhulu kangaka njengetheku,” kusho ukaunda, obekhuluma ngezinga lomonakalo odaleke ethekwini kulandela izimvula ezinamandla zangomhla ka-13 kumasingana.
Uthe kumele kube sobala ukuthi izimvula zangalolu suku zaba ngaphezulu kakhulu, kangangokuba akekho owayezilindele ukuthi zingashiya umonakalo omngaka.
Uthe nakuba zadala umonakalo kodwa okuhle wukuthi sebeqalile ukubuyisela isimo esimeni, futhi sezikhona nezinhlelo zokulungisa ingqalasizinda eyamosheka.
“Sikhuluma nje, ngondasa (March) nonyaka sizokwethula osonkontileka abahlukene, ukuze baqale ukwenza amalungiselelo okulungisa ingqalasizinda,” esho.
Ukaunda uthi umonakalo odale
kile ulinganiselwa ku-r1.4 billion.
Uphinde waphawula nangezinkinga zamanzi ezisaqhubeka nokuhlasela ezindaweni ezahlukene. Ngokusho kwakhe, baphezu kwalo udaba oluthinta ukusatshalaliswa kwamanzi, kodwa unxusa abantu ukuba bababekezelele.
Uthi kunengqalasizinda ethinta amapayipi nezigcinamanzi ezingakagcwali, okusamele zigcwale zifinyelele ezingeni.
Uthi nakuba besezinhlelweni zokuqeda ngezinkinga zamanzi, kodwa banazo nezinhlelo zesikhashana zokwengeza amaloli kamasipala athutha amanzi.
“Sizokwengeza amaloli azoba ngawethu, esizoqasha abashayeli basebenze ngokugcwele, kodwa inhloso yethu wukuthi inkinga yamanzi iphele nya,” kusho yena.
Ukuchithile ukuthi uhulumeni awuholayo ulinda kuze kudaleke umonakalo ukuze ubhukule, uqale usebenze.
Uthi nsuku zonke bahlale belungisa ingqalasizinda. Unxuse namalungu omphakathi ukuba aqikelele ukuthi ayayinakekela futhi ayayivikela ingqalasizinda.