Wasisiza udkt Dlamini-zuma wavala ukubhenywa kogwayi ematekisini
MHLELI: Ngicela ungiphe ithuba ngifisele udkt Nkosazana Dlamini-zuma usuku oluhle lokuzalwa ngithi, “unwele olude” sengathi angakhula aze akhokhobe.
Izindaba zokuthi usethi khumu ephalamende zingithokozisile kakhulu ukuze aphumule, abheke emuva iqhaza alibambile kusukela ngo-1994 ngesikhathi engena kulo.
Udkt NDZ ubesebenza ngokukhulu ukuzimisela nokukhuthala njengoba kunoma yimuphi umnyango abethunywa kuwona, ububonakala umehluko.
Uqale emnyangweni wezempilo kwakhiwa imitholampilo ezindaweni eziningi. Abasebulwer bangangifakazela ukuthi njengoba kuleya ndawo izibhedlela zikude nje kodwa umtholampilo (ipholela) wakhona ususebenza ubusuku nemini, uhlinzeka umphakathi ngezidingo zempilo.
Sibonile kuphasiswa umthetho onqanda ukubhenywa kogwayi ezindaweni zomphakathi nasematekisini.
Yize athola ukugxekwa ngosomabhizinisi kodwa wakuqinisekisa ukuthi kuyenzeka, ecaphuna umthetho othi umuntu ongabhemi kodwa ohogela intuthu kagwayi impilo yakhe ibasengcupheni enkulu yokungenwa wumdlavuza ngaphezu kwaloyo obhemayo.
Saphumula wukufuqwa ngogwayi ematekisini nasezindaweni zokudlela.
Simbonile engena emnyangweni wezasekhaya. Kwakunenkinga enkulu yomazisi abantu behlala lize liyoshona bengalutholi usizo. Uma umuntu esewushayile bekuphela izinyanga ungaphumi, abanye babephuma benamaphutha amaningi, wayezifikela qathatha ukuze abone ukuthi kusetshenzwa kanjani, zancipha izinkinga. Waphinda waba ngusihlalo weafrican Union (AU). Usebenzile kakhulu, ubeyisibonelo esihle nakithina siyimbokodo ukuthi uma unikwe umsebenzi, kufanele uwenze ngokwethembeka, ngenkuthalo nangeqiniso. Kuhle simbonge esaphila ukuze abone ukuthi umsebenzi abewenzela izwe lakithi siwuthokozele sithi, Dlamini! Sibalukhulu! Mdlovu! Magaduzela! Siswele imilomo ibe yizinkulungwane.