AMADODA 'ANESITHEMBU' AYAYIDINGA INCWADI YEFA UKUGWEMA IMIBANGO
MHLELI: Ngicabanga ukuthi sesifikile isikhathi sokuthi amadoda afunde ukubhala phansi zonke izinto afisa ukuba zenzeke uma kwenzeka edlula emhlabeni, ikakhulukazi lawo asuke ephila impilo yasesithenjini okungaba ngesisemthethweni noma esingaziwa.
Uma ngikhuluma ngesingazi- wa ngichaza lapho khona indo- da isuke ingamazisanga umkayo wokuqala esuke imshiye emakhaya ukuthi seyithole isincanakazana eseyihlala naso ngokugcwele edolobheni.
Phela ngokomthetho wakuleli ukuhlala nomuntu iminyaka kumnika ilungelo lasemshadweni, njengoba esuke enza konke okubhekwe noma okudingeka koganile.
Umsindo owasuka ngesihlalo sobukhosi bukazulu emuva kokukhothama kukamdlokombana kuwubufakazi balokhu engikhuluma ngakho.
Kodwa-ke okwenze ngaloba lo mbono wumsindo osuke emuva kokudlula emhlabeni kwengwazi yezeshashalazi umbongeni Ngema ngasekupheleni konyaka odlule.
Nakumadlokovu kusuke umsindo njengoba kuqhamuke nowesifazane wasegauteng ozibize ngengoduso yakhe encwadini abeyibhalele undunankulu wakwazulu-natal unkk Nomusa Dube-ncube efuna ukuba angenelele kulolu daba lokukhishwa kwakhe' ngaphandle emalungiselelweni okufihlwa kukangema.
Kimina kwanambitheka kabi ukuthi amagalelo kangema alokhu engcoliswa yimibango eyayifuna ukuqubuka ngabantu “ayehlekisana” nabo. Yingakhoke ngifisa sengathi wonke amadoda angathola isifundo ngoba ngolunye usuku umuntu ngeke angcwabeke, kubangwa ubunikazi besidumbu.
Ngikholelwa ekutheni umsindo kawufuneki emndenini uma kusuke kukhona odlule emhlabeni - njengoba kuyaye kuthiwe umuntu uyadlula uma enza okuphambene kungakafihlwa - kumele kuzothwe kuze kube ubekwa endaweni yakhe yokugcina. Kumele sikuqaphele ukuthi impilo esiyiphila emadolobheni kagcini seyenza sihlubukwe nayimindeni yethu esikhulise ngamasiko esisawagcina, okuyokwenza kube nzima nakuyona ukuba iqhubeke nawo ukusihlanganisa nezinyanya zemindeni noma singasekho emhlabeni.
Kodwa-ke wumbono wami nje lona engiwususela kwengikubuke kangaze ngakuthanda sekudlule le ngwazi ebengiyikhonze kakhulu njengoba lingapheli isonto ngingayidlalanga ingoma yayo istimela Sasezola kusukela kudala nje, ngoba ingikhumbuza ubusha bami.