Umosimane udalule okwenze waqeqesha ikilabhu evika izembe
UVEZA isizathu esenze wathatha umsebenzi wokuyoqeqesha ikilabhu esengcupheni yokugengcwa yizembe umqeqeshi wakuleli osezakhele udumo ngokulolonga amakilabhu amaarab.
Upitso “Jingles” Mosimane (osesithombeni) wethulwe njengomqeqeshi omusha we-abha FC yasesaudi Arabia.
Uqokwa yile kilabhu nje, ubesanda kuhlukanisa ifindo lomshado ne-al-wahda FC yaseunited Arab Emirates (UAE).
Ukuthatha kukamosimane lo msebenzi kushiye abathandi bebhola benemibuzo kwazise le kilabhu ibalwa nangase agengcwe yizembe kwisaudi Pro League.
Ilele kunombolo-17 kwi-log enamakilabhu awu-18. Inamaphuzu awu-14 emidlalweni ewu-19. Izembe ligengca amakilabhu amathathu kule ligi.
Ikilabhu engaphezulu kweabha, yi-al Tai enamaphuzu awu-17 emidlalweni ewu-18.
Umosimane udume ngokudla izicoco njengoba engakaze abhekane nesimo sokutakula ikilabhu ezembeni, uveze isizathu esenze wathatha lo msebenzi.
“Isizathu okuyisona esimqoka esingenze ngathatha lo msebenzi wukuthi ngingumuntu okuthandayo ukubhekana nezinselelo ezintsha empilweni, kangilona ivaka.
“Kula masizini esengike ngawasebenza, bengisemakilabhini ahlale ebalwa nazodla izicoco hhayi avika izembe. Yinselelo engifuna ukubhekana nayo lena.
“Yilapho ngizozibona khona ukuthi limi kuphi izinga lami lokuqeqesha,” kusho umosimane.
Ngesizini edlule umosimane ubelolonga i-al Ahli yakulo leliya lizwe wayisiza yenyukela esigabeni esiphakeme.
Imane yanyuka nje, kwabe sekuhlukwana. Umdlalo wokuqala kamosimane uzokuba sekhaya ngomhla ka-15 ngenyanga ezayo ne-al Taawoon esendaweni yesine kwi-log.