Iyayishaya ibafana eyokweswela isipiliyoni sabadlala e-europe
Ukomphela uyibona ingakwazi ukudlulela esigabeni esilandelayo kwi-afcon
KUYAYISHAYA ibafana Bafana ukungabi nabadlali abanesipiliyoni sokudlala emaligini amakhulu ase-europe njengoba isempini yokuzama ukunqoba i-africa Cup of Nations (Afcon), eqhubeka e-ivory Coast.
Lona ngumbono kasteve “Mphathi” Komphela (osesithombeni) ongumqeqeshi wemoroka Swallows - obephawula emuva kokuba ibafana idlulele esigabeni sika-last 16 salo mqhudelwano.
Ibafana ibambane netunisia ngo-0-0 ngolwesithathu ebusuku okwenze yaqeda ibambe isibili kwigroup E enqotshwe yimali.
Ibafana seyizobhekana nemorocco esigabeni sika-last 16 emdlalweni ozokuba ngolwesibili ngo-22h00.
Ukomphela ubekhuluma nabezindaba esenhloko-hhovisi yehollywoodbets egateway, emhlanga, ethekwini, lapho ABESABC TV bebesakazela khona umdlalo webafana netunisia.
Ubengomunye wabahlaziyi ngesikhathi kuqhubeka lo mdlalo.
“Kuyiqiniso elingephikwe ukuthi kuyasilimaza ukungabi nabo abadlali abagijima phesheya kwezilwandle kwibafana.
“Njengamanje sisizwa wukuba nesipiliyoni sabadlali bemamelodi Sundowns sokugijima emiqhudelwaneni yecaf (kwichampions League nakwi-africa Football League).
“Amazwe amaningi anabadlali abadlala e-europe okuwasebenzela kakhulu njengoba enabadlali abenza kahle,” kusho lo mqeqeshi owake waba ngukaputeni webafana esadlala eturkey waphinda waba ngumqeqeshi wayo.
Mayelana namathuba okwenza kahle kwebafana kulo mqhudelwano, lo mqeqeshi uthe ubona elakuleli linalo ithuba lokudlulela esigabeni esilandelayo sama-quarter final.
Kuzokhumbuleka ukuthi ngesikhathi ibafana inqoba i-afcon ngo-1996, yayibunjwe ngabadlali abaningi ababegijima e-europe. Cishe esikwatini sebafana esasiqala imidlalo ngo-1996, nguneil Tovey nolinda Buthelezi kuphela ababezinze kuleli. hudla@ilanganews.co.za www.ilanganews.co.za