UMFANA KAGOGO NOMKHANKASO WOKULEKELELA IZIKOLE NABAFUNDI
UKUNGABI nawo umfaniswano ngesinye isikhathi nokufunda esikoleni esintulayo ngokwezinsiza zokufunda kumenze wafisa ukulwisana nale nkinga umculi osemncane, usipho ‘Mfana kagogo’ Mbonambi (20), oqale umkhankaso wokulekelela abafundi abaswele nezikole ezintulayo.
Izolo ngolwesihlanu, lo mculi ubehambele isikole ayefunda kusona ifundinduku Secondary, etafelkoop, epinetown, lapho enikele khona ngemali engango-r30 000 ukulekelela ngezidingo zaso.
Ngokusho kukamnu Bheko Sokhela, ongumphathi wedurban Base Entertainment, angaphansi kwayo (umfana kagogo), lo mculi ukhethe ukuqala ngesikole ayefunda kusona ngenxa yokuziqonda kangcono izinkinga ezibhekene naso.
“Isikole kasikho esimeni esigculisayo, siyashoda kakhulu ngezinsiza kusebenza. Izindlu zangasese kazikho esimeni. Ngingasho nje ukuthi kazikho ngoba uma abafundi befuna ukuzikhulula, bajikela ngemuva kwamakilasi, ugesi waso uxhunywe komakhelwane ngoba kawusebenzi owangaphakathi.
“Njengendlela yokubuyisela emphakathini, usipho unqume ukuya kulesi sikole ngoba yisona asiqonda kangcono nafunde kuso waze waphothula umatikuletsheni ngo-2022,” kusho usokhela.
Uthe ukuhambela lesi sikole kwalo mculi kuseyisiqalo njengoba zisekhona ezinye azozihambela. Uthi lokhu uzokwenza ngokulekelelana nabaxhasi abatholile.
“Lokhu kwanamuhla kuyisiqalo ngoba umkhankaso wokulekelela abafundi abaswele usaqhubeka. Lokhu kuzokwenzeka ngosizo esiluthole kubaxhasi athe uma engqongqoza kubona usipho, bamemukela.
“Kulaba baxhasi abalekelele kokwanamuhla yihollywood Foundation nenkampani yezimoto ihyundai, epinetown, exhase ngemoto esizoyisebenzisa ukuhambela lezi zikole,” esho.
Uveze ukuthi umfana kagogo usevule nenhlangano engenzi inzuzo, ezonikela ngokudla nemisubelo (pads), ezikoleni ezisemakhaya.
Uthi lokho kutholakala ngoxhaso lwezitolo, osomabhizinisi, nanoma yiliphi ilungu lomphakathi elingafaka isandla. Ubike ukuthi miningi neminye imikhankaso ezothuthukisa izikole zasemakhaya azobonakala kuyona lo mculi.
“Kuza neminye imikhankaso lapho usipho, ngokubambisana nenkampani i-go Digital, ayinxusa layo, bezohambela izikole ezisemakhaya beyofundisa abafundi ngobuchwepheshe nokusebenzisa imishini yabo (ubuchwepheshe).
“Kuzoba neminye-ke futhi lapho ezolekelela abafundi ngezifundo zabo. Angikuqinisekise ukuthi abafundi ngeke bakhokhe ngisho isenti kulezi zinhlelo azoziqhuba,” kuphetha usokhela.
Kuzokhumbuleka ukuthi ihollywood Foundation, iveze ukuthi ibeke eceleni imali engango-r8 million ukulekelela kwimikhankaso yokubuyisela kubafundi ezikoleni zaseningizimu Afrika.