Kudutshulwe, kwashiswa abesifazane
BESE kuyisikhathi eside behlala ngokuzingelwa abesifazane ababili abadutshulwe babulawa emzini wabo emthekwini, ehluhluwe, ngezithuba zakusihlwa ngolwesithathu. Unkk Sarafina Manqele (80) nendodakazi yakhe, unkz Busaphi Manqele (40), bangenelwe ngababulali abangaziwa abafike bangakhuluma lutho, bavulela ngezulu lezandla bebhekise kubafi.
Kulesi sigameko kudubuleke nomfanyana oneminyaka ewu-15, engalweni.
Ubusaphi wehlelwe yilo mshophi ngoba efike kubo evakashele unina njengoba isikhathi esiningi ubesichitha lapho abehlala khona ngenhloso yokusondelela umsebenzi ngoba ubenguthisha kwesinye sezikole zasemtubatuba, ibhoboza Primary School.
Ngokusho kwelungu lomndeni elicele ukuba kugodlwe imininingwane yalo, liveze ukuthi ukubulawa kwamalungu alo mndeni kuhlobene nezinsolo ebezibhekiswe kunkk Manqele obesolwa ngokuthi uyathakatha.
“Kudala baqala ukukhuluma kabi ngogogo kuthiwa uyathakatha.
“Lezi zinkulumo bezikhulunywa zigcine sezibandakanya nayo indodakazi yakhe abulawe nayo, kuthiwa useyifundise ‘umsebenzi wakhe’ wokuthakatha,” kusho leli lungu.
Umnu Sabukusho Manqele oyinduna yendawo futhi oyilungu lomndeni, uveze ukuthi lesi sigameko sishiye abantu beshaqekile endaweni.
Uthe omakhelwane babafi baveze ukuthi bezwe ukuqhuma kwesibhamu okuthe kusenjalo, kwabonakala kuphakama ilangabi lomlilo.
“Ngithole umbiko ngezithuba zantambama ngokuthi sekudutshulwe umama nodadewethu lapha ekhaya. Kudala baqala ukumhlukumeza umama. Bebemthathela nezimbuzi zakhe. Abanye bazithathe ngenkani ngoba becuphe ulaka.
“Sinethemba lokuthi amaphoyisa azosebenza ngokuzikhandla ukuze kuqinisekiswe ukuthi ababulali bayaboshwa ngoba benze isihluku esinyantisayo.
“Okubi kakhulu wukuthi ugogo ubehlala nezingane ezimbili okumanje sekuzoba nzima kuzona ukuphila. Udadewethu ubenguthisha esikoleni abefundisa kusona, nakhona okusazoba nzima ukuchazela abafundi ukuthi ukuphi uthisha wabo,” kusho umanqele.
Okhulumela amaphoyisa Kwazulu-natal, ult Colonel Nqobile Gwala, uthe amaphoyisa asehluhluwe avule amacala amathathu, okungelokubulala, elokuzama ukubulala nelokushiswa kwempahla.
Uthi kusolakala ukuthi abasolwa abathathu bangene endlini obekuhleli kuyona izisulu ezineminyaka ephakathi kwewu-40 no-80 ubudala, bangakhuluma lutho, bavulela ngenhlamvu bebhekise kubafi.
“Izisulu ezimbili zishonele endaweni yesigameko.
“Umfana (15) udubulekile. Kabagcinanga lapho abasolwa njengoba bebuye bashisa nendlu obekuhleli kuyona izisulu. Uphenyo luyaqhubeka,” kuphetha ugwala.