ABEZEMFUNDO EPHAKEME NOMKHANKASO WOKUTSHALA UTHANDO LWEMISEBENZI YAMAKHONO ENTSHENI
ISEKELA likangqongqoshe wemfundo ephakeme kuzwelonke umnu Buti Manamela lithi bafisa ukukhiqiza abafundi abazoba ngompetha emikhakheni yamakhono ngoba yiyo le mikhakha edingekayo ekukhuphuleni umnotho wezwe.
Umanamela usho lokhu ngesikhathi emukela izihambeli nezitshudeni ezizoncintisana kulo mcimbi, obanjelwe e-inkosi Albert Luthuli International Convention Centre, ethekwini, okulindeleke ukuba uphothulwe ngesonto.
Uthi kulo mncintiswano kuzogadulisana abafundi basemakolishi nasemanyuvesi ezobuchwepheshe abalinganiselwa ku-200. Uveze ukuthi cishe u-80% walaba bafundi uphuma emakolishi akuleli.
“Sihlale sigcizelela ukuthi sifisa amakolishi ethu akhiqize abafundi abangompetha emakhonweni ehlukene, futhi abazokwenza imisebenzi edingwa umnotho wakuleli. Angikusho ukuthi wonke umuntu oyingxenye yalo mcimbi unelungelo lokwabela abanye ngolwazi analo kulokho okuthinta amakhono,” kusho umanamela.
Ubike ukuthi umnyango wabo uhlose ukukhiqiza abafundi abawu30 000 minyaka yonke abagogodile kwezamakhono kusuka kulo nyaka kuze kube u-2030. Uthi abafisa ukungenela lo mncintiswano kusukela ngonyaka ozayo, bazobalekelela ngoqeqesho.
“Wonke umuntu onombono noma nolwazi oluthile olungathuthukisa ukusetshenziswa kwamakhono angaludluliselela kwabanye ukuze sikwazi ukukhiqiza leli nani esifisa ukulikhiqiza. “Kwabazongenela lo mncintiswano kule minyaka ezayo, bazothola ukuqeqeshwa okufanele, njengoba sizokwethula izingqungquthela ezizoholwa yizingcweti ezisemikhakheni eyehlukene kuleli. Bazophinda baqeqeshwe nangendlela abangabhekana nazo zonke izingqinamba abangahlangabezana nazo,” esho.
Uthi bazoqhubeka baxhase ngezinsiza ezifanele zokuthuthukiswa kwamakhono emakolishi, ukuze nabafundi abasezikoleni bezoba nothando lokwenza lolu hlobo lwezifundo.
Lo mncintiswano oba minyaka yonke, uvuleleke kubo bonke abafundi abenza izifundo zamakhono emakolishi akuleli. Abangenelayo kumele babe neminyaka engaphansi kuka-25.
Ozodla umhlanganiso kulo nyaka uzomenyezelwa ngesonto, kanti uzoyomela iningizimu Afrika emncintiswaneni wamakhono wamazwe ehlukene ozobanjelwa efrance ngomandulo (September) nonyaka.