UMASIPALA WETHEKU MAWUNQUME IZIHLAHLA NOTSHANI EMIGWAQWENI
MHLELI: Nakhu konakala kube kungalungiswa.
Uhulumeni ophethe umasipala wetheku udembesela ukusikwa kotshani nezihlahla ikakhulukazi lezi zokufika.
Utshani obungasikwa busebuncane futhi bungaqoqwa noma sebusikiwe, bungazidala izinkinga ekulimazeni umgwaqo ikakhulukazi owakhiwe ngetiyela. Utshani obumila emgwaqweni bunamandla okulimaza itiyela.
Utshani obusikwe bangaqoqwa bungagugulwa ngamanzi bese bungena emapayipini amanzi nasemihosheni okungagcina ngokuthi kuvaleke amapayipi (drainage system).
Lokhu-ke kungaholela kwinhlekelele. Izihlahla-ke zona ezingewona umsinsi kuleli zingumbulalazwe uqobo ngoba zimila kalula nangokushesha, ubusika nehlobo futhi zinembewu esabalala kalula.
Esinye sazo sithi masifane nse nokotapheya amahlamvu aso.
Lesi kasifuni uze utshale imbewu, sinempande ekwazi ukujika imile. Lesi esinye siqhakaza imbewu enombala ophuzi, eqhakaza bese iqhuma isakazeke ngokushesha ngoba iphephuka kalula.
Lezi zihlahla bezinqunywa kudala ngenhloso yokuziqeda.
Kazisanqunywa muva nje, kangazi noma kwalabo ababhekelele lo msebenzi (kabasekho) noma yindab’ endala yokungabi khona kwemali ehlinzekelwe lo msebenzi.
La kwelakithi kunalo mkhuba wokuthi izinto zingalungiswa kuseyisikhathi.
Ukungazilungisi izinto kungaba nomthelela kwizinhlekelele zamanzi kanti futhi kuyamosha nakwinkece ngoba kuba sengathi kuqalwa phansi.
Iziphathimandla mazifunde ukwenza umsebenzi ngokohlelo, zingalindi into ize ife kumbe kube nenhlekelele.
Mabunqunywe utshani bese buyabuthwa buyolahlwa endaweni efanele.
Indawo yokulahla utshani nezihlahla esisuke sikusike emakhaya mayibe khona nasezindaweni zabampisholo ukuze imfucuza iqoqeke.
Makungabi sengathi sisaphila ngesikhathi sobandlululo lapho izindawo zemfucuza zazisezindaweni zabamhlophe kuphela.
Ukungabi khona kwendawo yokulahla imfucuza esondelene nendawo yabampisholo kwenza abantu ubone sebelahla udoti eduze komuzi othile.
Mazinqunywe izihlahla zokufika ngoba zicindezela imvelo yethu. Thina sikhule kunezihlahla okwakuthiwa ‘unsangwana’ ‘nomhlakuva’.
Lezi zihlahla zabulawa ngoba zazivala indawo yezihlahla esizidingayo. Ngiyacela ukuba zinqunywe izihlahla zokufika, kakade zakhelwe ukuthi zizocindezela ezethu. Zakhiwa ngusathane wakhona la emhlabeni.