UNCOMA USHINTSHO OLUBONAKALA EZWENI
UMENGAMELI wezwe umnu Cyril Ramaphosa uncome uhulumeni WE-ANC ngenqubekela phambili ebonakalayo emizameni yokukhulisa umnotho, ukudala amathuba emisebenzi nokunciphisa ububha.
Uthembise nokuthi bazoqhubeka nokwakha umnotho ohlomulisa wonke umuntu, futhi bagxile ekuthuthukisweni kwabantu abamnyama nabesifazane baseningizimu Afrika, baphinde bathuthukise namalungelo ezisebenzi.
Uramaphosa usho lokhu ngesikhathi ethula inkulumo mayelana nesimo sezwe ephalamende ecape Town ngolwesine ebusuku.
Uchaze iminyaka eyisihlanu edlule ngokuthi ibe ngeyesikhathi sokwakhiwa kabusha nokuvuselelwa kwezwe.
Wethembise isizwe ukuthi bazoqhubeka nokuqinisa izikhungo zezomthetho babhekane nodlame olubhekiswe kwabesifazane futhi balwe nenkohlakalo ukuze kuphuculwe iningizimu Afrika ibe yindawo ephephile yawo wonke umuntu.
Uthi kule minyaka edlule kudingeke ukuba basebenze kanzima ukulungisa umonakalo owenziwe yilabo abasolwa ngokuqhwaga amandla ombuso.
“Kuye kwadingeka ukuthi sivuselele umnotho wethu ngemuva kweminyaka engaphezu kweshumi yokusebenza kabi kwawo. Kudingeke ukuthi sakhe kabusha izikhungo zethu zikahulumeni ngemuva kwesikhathi sokuqhwagwa kombuso,” kusho uramaphosa.
Kuyo le minyaka eyisihlanu edlule, uthi baphinde basebenza ukuthuthukisa amalungelo abantu abakhubazekile. Ubalule indaba yabantu abakhuluma ngezandla, wathi: “Siyaziqhenya kakhulu ngokwenza ulimi olukhuluma ngezandla lube wulimi luka-12 olusemthethweni ezweni lethu.”
Uramaphosa uphinde wathi benze nesiqiniseko sokuvikela inkululeko yabezindaba nokuzimela kophiko lwezobulungiswa.
Uthi bavikele baphinde bathuthukisa amalungelo alabo abathandana nabobulili obufanayo nobabo.
“Siyaqhubeka nokulwa nazo zonke izinhlobo zokucwasa nokungabekezelelani,” esho.