I-IFP inxenxa abantu kulungiswe umonakalo
“SUKUMANI (ukuze) sonke sakhe izwe lethu. Sukumani silungise umonakalo. Sizonqoba ngokubambisana.” Usho kanjena usihlalo WE-IFP Kwazulu-natal, umnu Thami Ntuli, ekhuluma emcimbini obusehholo lomphakathi kwa-m emlazi izolo ngolwesihlanu.
I-IFP ibiyogqugquzela umphakathi ukuphuma ngothi lwayo ukuyokwethamela umcimbi lapho izokwethula khona umqulu wayo wezethembiso zokhetho mhla ka-10 kundasa (March) emoses Mabhida Stadium. Unxenxe abantu ukuthi benze isiqiniseko sokuthi kuphuma nesinedolo.
“Makungabi bikho muntu oyosala ekhaya. Uma ungubaba unenkosikazi, hamba nenkosikazi nezingane. Uma unomngani, hamba naye. Kufanele siyoqopha umlando ukuthi inkatha igcwale ize ime ngaphandle kwemabhida Stadium,” kusho untuli.
Utshele umphakathi ukuthi ngalolo suku I-IFP izokwethula izinhlelo zayo ngeningizimu Afrika nabantu bakwazulu-natal.
Uphawule ngesimo setheku esingagculisi, wathi I-ANC yehluleke yancama ukuphatha leli dolobha.
Uthi idolobha lingcolile futhi aliphephile. Uthi akuselona leliya Theku elalaziwa kudala, lituswa futhi lithandwa.
“Kumele sisishintshe lesi simo. Ivoti lakho lingasishintsha isimo. Ivoti lakho lingawenza umehluko,” kusho untuli.
Khona izolo untuli uphinde wahlangana namanye amakhosi. Kulo mhlangano uthi bebexoxisana ngokuthi baya kanjani okhethweni.
Ngomgqibelo uhlangane nezinduna zasemahostela eyogqugquzela ukuba umphakathi uphume ngothi lwawo ukuyokwethamela umcimbi wokwethulwa komqulu wezethembiso zokhetho.
“Sixhumana nezinhlaka eziningi zomphakathi, la esikhuluma khona ngokubambisana nazo njengoba siya okhethweni, nanokuthi ngale kokhetho kuyoba yikuphi ukubambisana okuyoba khona,” kusho untuli.
Uthi kulo mcimbi babheke ukuthi imoses Mabhida igcwale phama. bhekin@ilanganews.co.za