Kukhuthazwe abangenzanga kahle ku-matric
Kuklonyeliswe nabenze kahle, banikwa namazwi awumphako wendlela
IMEYA kumasipala umshwathi umnu Mandla Zondi, ithi kubalulekile ukuthi abazali babafundi bakamatikuletsheni babe neqhaza abalibambayo ekulekeleleni othisha ngabantwana babo abenza umatikuletsheni. Isho lokhu emcimbini obubanjelwe ebreeze Inn, ehhotela elikhona emshwathi, izolo ngolwesihlanu, lapho iveze khona ukuthi uma abazali bebambisana nothisha lokho kubonakala emiphumeleni yabafundi.
“Siyabonga kakhulu kubafundi bakamatikuletsheni wangonyaka odlule ngokusebenza kwabo ngokuzikhandla okungaka. Esiziqhenya kakhulu ngakho wukuthi ezikoleni eziyishumi esizozibungaza, esokugcina kuzona sinamaphesenti awu-91.5. Lokhu kusikhombisa ngokusobala ukuthi abafundi bakamatikuletsheni wangonyaka odlule basebenze ngendlela emangalisayo,” kusho uzondi.
Imeya iphinde yaphonsela abafundi abangaphumelelanga inselelo yokuthi bangalilahli ithemba kepha bavuke bazithathe.
“Kakulahlwa mbeleko ngakufelwa, ngakho-ke sifisa bazi ukuthi zikhona izinhlelo zokulungisa imiphumela yabo futhi bavumelekile nokuthi babuyele ezikoleni abebefunda kuzona, bayoqala phansi uma befuna ukwenza lokho,” kusho imeya.
Uzondi uthi kubalulekile ukuthi babe nezinhlelo ezinjengalezi ngoba uhulumeni uhambisa phambili imfundo futhi kubalulekile ukugqugquzela ukuzikhandla kubafundi.
“Ukubungaza abafundi kubalulekile kanjalo nokuthi siphinde sisebenzise leli thuba ukubayala njengoba besuke sebeyoqala impilo abangayazi ezikhungweni zemfundo ephakeme.
“Siyabanxusa ukuba baziphathe kahle, bangafiki laphayana bakhohlwe yizimo ezahlukene abazishiye emakhaya. Siyazi ukuthi abafundi abaningi yilapho besuke bethola khona inkululeko nokuyaye
kube sekuholela ekutheni benze izinto ezingabafikisi ndawo,” kusho yena.
Kuphinde kwabungazwa nabafundi abane abebefunda ngemifundaze ababeyinikwe yilo masipala kanti kuyimanje kunababili asebeyinikiwe ngesikhathi kusacutshungulwa izicelo zabanye.
Unkk Nokukhanya Khanyile obefunda ngomfundaze walesi sikole, ukhuthaze abafundi ukungahambeli kude nomasipala noma kunolwazi abaludingayo.
Omunye wabafundi abahlonishiwe kube nguzamasishi Madlala (18), obefunda emasijabulise High, othole amaphesenti awu-100 kwihistory.
“Ngithathwe esikhungweni semfundo ephakeme i-university of Kwazulu-natal, lapho ngiyokwenza khona izifundo zomthetho. Ngijabule kakhulu ukuthi umasipala usibungaze ngemiphumela yethu esiyithole ngokusebenza kanzima,” kusho yena.
Ube esekhuthaza abafundi abenza umatikuletsheni kulo nyaka, wathi kumele baqale kusemanje ukuzimisela ngoba kakukho abangakwenza uma sekuphakathi nonyaka.
“Uma ufuna ukuphumelela, kumele uqale manje ukuhlala ezincwadini zakho,” kusho yena.