Uthekele ulwazi kuyise osenenkampani yamatshe esikhumbuzo
Ukhala ngamakhasimende angawethembi kakula umsebenzi wakhe ngoba engumuntu wesifazane
IBHIZINISI yinto akhuliswe ngayo usomabhizinisi wasesebokeng, egauteng, osenenkampani eyenza amatshe esikhumbuzo kwabasuke bekhumbula abantu abangasekho emhlabeni.
Balungisa nabhidlikile, bavuselele asegugile.
Unkk Nomgidi Mashinini ukhulele emndenini onebhizinisi lokungcwaba, wafunda okuningi kuyise ngokuphatha ibhizinisi iminyaka ewu-14 esebenza naye.
Ngokubona ukuthi usenolwazi olwanele ukuzimela, usungule i-abongwe Memorials, okuyibhizinisi aliqambe ngendodana yakhe.
Amatshe aqala ku-r6000 kuya phezulu. Amakhasimende abo amaningi asegoli, elimpopo nakwazulu-natal.
“Ngaphandle kokuthi bese nginamagalelo anele ukuzimela ngokuphelele, okunye okwenza ngasungula leli bhizinisi ngo-2022 wukufisa ukuba nento ezoba yifa laphakade lendodana yami, okuwukuphela kwayo,” esho.
IBHIZINISI LAKHE LICHUNYISWA WUBUHLE NEZINGA ELIPHEZULU LOMKHIQIZO
Unkk umashinini – osezinze evereeniging, egauteng – uthi wadela konke ayenakho eqala inkampani ngo-r250000 awusebenzisa ukuthola ihhovisi lokusebenzela esebokeng, wathenga imishini yokwenza amatshe neloli lokuwathwala.
“Ingxenye yaleyo mali yasiza ukuqasha izisebenzi eziyisikhombisa kanti imali ngayikhipha ngokukhululeka ngoba nginethemba lokuthi ibhizinisi lami lizochuma ngoba ngasenginolwazi olwanele ngalo.
“Ubuhle, izinga eliphezulu lomsebenzi nokubeka amakhasimende phambili yikho okuchumisa ibhizinisi lami,” kusho unkk umashinini.
UHLALE EQIKELELA UKUTHI IBHIZINISI LIYADLONDLOBALA
Nakuba ibhizinisi lakhe liza kahle kodwa ukhala ngokuthi ukuba semkhakheni ogcwele abantu besilisa kwenza amanye amakhasimende angawethembi kalula umsebenzi wakhe, ngoba engumuntu wesifazane.
“Kunzima kunjalo, kangipheli (amandla). Ngihlale ngizimisela ukuqikelela ukuthi ibhizinisi lami liyaqhubeka lidlondlobale, ukuze ligcine selaziwa iningizimu Afrika yonke ngomsebenzi omuhle eliwenzayo emphakathini,” esho.