Uramaphosa uthembise lukhulu ngenkinga kagesi
Ukushoda kwawo kube sesandla ekukhinyabezeni ukukhula komnotho wakuleli
SEKUSEDUZE ukuba uhulumeni unqobe inkinga yokushoda kukagesi eningizimu Afrika njengoba ziningi izinhlelo nemizamo eyenziwayo ukuyilungisa. Lesi ngesinye sezethembiso ezenziwe ngumengameli Cyril Ramaphosa ngolwesine ebusuku ngesikhathi ethula inkulumo ebhekiswe esizweni.
Uramaphosa obethula le nkulumo okokugcina njengomholi kahulumeni owathatha izintambo zombuso ngo-2019, uthe bahlanganisa icebo elicacile futhi elisetshenziswayo ukuqeda ukucinywa kukagesi, elenganyelwe yikomidi elibheke inkinga kagesi, inational Energy Crisis Committee.
Uthe bakwenzile abazibophezela kukhona ukuletha ugesi omusha ngokuthola abatshalimali abazimele, osekuqalile ukusiza ukunciphisa ukucima kukagesi.
UTHI SEKUXHUNYWE UGESI OPHEHLWA NGELANGA NOMOYA ONGAPHEZU KUKA-2 500MW
“Ngonyaka odlule sithole indlela yokuphungula isikweletu okuzosiza i-eskom itshale imali ekunakekeleni ingqalasizinda yokusabalalisa ugesi ukuqinisekisa ukuthi uhlale ukhona.
“Kusukela sibuyise uhlelo lukagesi ovuselelwayo eminyakeni eyisihlanu edlule, sesixhume ugesi ophehlwa ngelanga nomoya ongaphezu kuka-2 500MW kugesi otholakala ezweni kanti omunye ugesi ophindaphindwe ka-thathu kulona usezinhlelweni zoku-thengwa noma zokwakhiwa,” esho.
Ukhumbuze isizwe nangohlelo olusebenzisa intela ukukhuthaza abantu ukutshala imali ekufakeni ingqalasizinda kagesi ophehlwa ngelanga nezinguquko ezenziwe emthethweni kagesi ezenze ukuba yande imali etshalwe yimboni ezimele ukuphehla ugesi njengoba ethe kunemisebenzi engaphezu kwewu-120 eqhubekayo.
UTHEMBISE UKUSHINTSHA UGESI UKWANDISA UKUNCINTISANA FUTHI WETHEMBEKE
Uthe zonke lezi zinhlelo eziguqula imboni kagesi njengokuhambisana nokwenzeka kwamanye amazwe, zinciphisa namanani kagesi.
“Ngazo zonke lezi zinyathelo, sinethemba lokuthi sesidlulile ebunzimeni obukhulu futhi sekusemome ukuba iphele into yokucima ugesi. Kasigcini lapho. Ukuqinisekisa ukuthi ngeke siphinde sibhekane nenkinga efanayo, sishintsha ugesi wethu ukuze kwande ukuncintisana futhi uthembeke.
“Sizokwakha olayini bokusabalalisa ugesi abangaphezu kuka-14 000km ukwenzela ugesi ovuselelwayo eminyakeni ezayo.
“Ukusheshisa uhlelo, sizovumela imboni ezimele itshale imali kwingqalasizinda yokusabalalisa ugesi ngezindlela ezahlukene ezintsha,” esho.
KULAHLEKE IMALI ENGAPHEZULU KUKA-R1.6 TRILLION NGOKUSHODA KUKAGESI
Ukungabibikho kukagesi owenele ngenye yezinto ezibe nesandla ekukhinyabezeni ukukhula komnotho njengoba ne-international Monetary Fund isanda kuthi isilindele ukuthi umnotho waseningizimu Afrika ukhule ngo-1% kulo nyaka, esikhundleni sika-1.8% eyayiwulinganisile ngonyaka odlule.
Inkinga yokushoda kukagesi iqale ngo-2008 kanti imizamo eminingi eyenziwayo ukuyilungisa kayikatheli izithelo ezitheni.
Ngonyaka odlule ungqongqoshe womnyango kagesi udkt ukgosientsho Ramokgopa, wathi imali elahlekile ngezinto ezingabe zenzekile emnothweni ngenxa yokungabibikho kukagesi owenele ngo2023 iwu-r1.6 trillion, athi yayingaphezulu ngo-r400bn kokwenzeka ngo-2022.
UTHE MININGI IMISEBENZI EZOVULEKA EZIMBONINI ZIKAGESI OVUSELELWAYO
Uramaphosa ukhulume nangomphumela wokuguquguquka kwesimo sezulu, wathi zandile izigameko zomonakalo odalwa yisimo sezulu esingesihle okuvame ukuthi kube yizikhukhula ethekwini, Kwazulu-natal, kuthi entshonalanga Kapa, kube yimililo yequbula.
Uthe yingakho beqhubeka nohlelo lokuguqula indlela ugesi otholakala ngayo ijust Energy Transition ukunciphisa ukukhiqiza umoya ongcolisayo ukulwa nokuguquguquka kwesimo sezulu kodwa futhi kukhule umnotho, kwande imisebenzi.
Uthe miningi imisebenzi ezovuleka ezimbonini zikagesi ovuselelwayo, i-green hydrogen, i-green steel, izimoto zikagesi neminye imikhiqizo engacekeli phansi imvelo.
USEBENZISE LE NKULUMO UKUKHANKASA NJENGOBA KUYIWA OKHETHWENI LUKAZWELONKE
“Sesinqume ukweseka ukukhiqizwa kwemoto kagesi eningizimu Afrika ukukhulisa imboni yezimoto ehlinzeka izinkulungwane ngemisebenzi. Sinqume ukugxila ezifundazweni ezifana nempumalanga ukwakha izimboni ezintsha, amathuba amasha omnotho nemisebenzi,” esho.
Uthe imali asebeyitholile yokuxhasa ijust Energy Transition isikhuphukile isuka ku-r170 billion yafinyelela cishe ku-r240bn.
Uramaphosa, obengabuyekezi nje iminyaka emihlanu ewumengameli kodwa obebheka neminyaka ewu-30 kwaqala ukubusa uhulumeni wentando yabantu, usebenzise le nkulumo ukukhankasa ebalula inqwaba yezinto ezinhle athe zenziwe wuhulumeni oholwa YI-ANC oseloku wathatha izintambo ngo-1994.
YIZE KUKHONA OKUFANELE KUNCONYWE NGOHULUMENI KODWA KUNINGI OKONAKELE
Ekhuluma ngokonakele, ugxile kakhulu ekutheni izinto ezonakele zenzeke kuphela ngesikhathi seminyaka yokugwanyandwa kwamandla ombuso, athe selokhu kube nguyena umengameli, umsebenzi abebewenza bekuwukulungisa umonakalo owadaleka ngaleso sikhathi.
Ukhulume nangenkinga yezokuthutha nezinhlelo ezikhona zokuyilungisa, imizamo yokusungula amathuba emisebenzi, ukuphucula ezemfundo nokulwa nobugebengu nenkohlakalo.
Uvumile ukuthi yize kukhona okufanele kunconywe ngohulumeni wentando yabantu kodwa kuningi okonakele, okufanele ngabe kungcono kunokuyikho.
* Lolu daba luqale lwashicilelwa ku: www.umbele.co.za