Ngimfisela okuhle undunankulu wesizwe samazulu nesekela lakhe
MHLELI: Selisuke lahlala, kuphelile ukuqagula nokudlinza kokuthi ngubani ozokuba ngundunankulu wesizwe samazulu okuqale ngemuva kokuba kukhothame inkosi umangosuthu Buthelezi ezinyangeni ezinhlanu ezedlule.
Umfundisi Thulasizwe Buthelezi usengundunankulu omusha wesizwe sakithi.
Iphini lakhe yinkosi uphathizwe Chiliza yasekubuseni, exobho.
Kuningi-ke okushiwo ngabantu ngokuqokwa kukandunankulu.
Abaningi babelindele ukuthi kuzoqwa inkosi yesizwe simbe, noma elinye ilungu lasendlunkulu kazulu.
Abanye bebebuza ukuthi umuntu angasihola kanjani isizwe esikhulu kangaka, esinezinduna, amabutho namakhosi singekho isizwe osiholayo.
Nami nje ngangidlinza ukuthi cishe imbube yayizophakamisa inkosi uzuzifa Buthelezi nakuba kwakuzoba nokukhuluma kokuthi kanti “siyifa” yini lesi sikhundla.
Ngangidlinzela nenkosi NR Cebekhulu yasobizo, empangeni, kanjalo nengwevu inkosi PB Biyela yakwamthiyaqhwa, enkandla.
Siyawazi amagalelo abo ebuholini bomdabu, bangabazukulwana bamaqhawe futhi aziwayo emlandweni wesizwe.
Ngayibona inkosi uchiliza iphuma etendeni lezicukuthwane ixila, ishingila, igcakela, igodle inkomo yasemadungeni, isondela eduze kwesilo ngemuva kokumenyezwa kwegama layo.
Inkosi umdunge, ingumzukulwana
wenkosi udonsela kabhoyiya kamzakuza, angiyingabazi kulesi sikhundla.
Ngesikhathi iphethe indlu yabaholi bomdabu kwamthaniya, bekuthi uma kugetshengwe inkosi noma induna ibhodle kubabaze amawa nezinkalo zonke zesifundazwe.
Ibisebenzisana kahle kakhulu nomdlokombana nenkosi ubuthelezi.
Uma isikhuluma ngezithinta ubukhosi ibima mpo, ikubeke eceleni okunye njengoba wayenza nondunankulu wangaphambilini wesizwe.
Empumalanga Koloni ngiyifanisa nesekela likangqongqoshe wezamajele, inhloko yesizwe samagengebe, inkosi uphathekile Holomisa (Ahh Dilizintaba!) yasemqanduli, kanjalo nowayeyilungu lephalamende futhi oyinhloko yesizwe samabhala, inkosi umwelo Nonkonyane (Ahh Zanemvula!).
La makhosi akwezombusazwe, kodwa nxa sekuthintwa ezobukhosi,
abelwela ukufa.
Kukhona lapho uhulumeni wawuhlo-ngoza khona ukuvalwa kwesiko lokusoka ekoloni.
Abhoka akhahlela amakhosi, elwisa uhulumeni ophethwe yiqembu lawo.
Masimnike ithuba-ke owakwangqengelele. Masingambuki njengendoda kakhololo kuphela.
Ukhonjwe yindlulamithi, futhi ngayilalelisisa ichaza ukuthi ngokwenqubo yasendlunkulu, inelungelo lokuqoka undunankulu ngale kokubonisana namanye amalungu.
Ngimfisela okuhle undunankulu nesekela lakhe emsebenzini wabo wesizwe.
Sikholwa wukuthi bazosebenzisana kahle ngoba ingathithi bahlobene – undunankulu uzalwa kubo kwesekela. Ngiyabonga.