Babona bezovunwa yizinto abe-arrows kowedowns
Bavale izindlebe kwabathi bazodlala nesikwati esibuthaka samasandawana
UKHOLWA wukuthi isikhathi sekhefu abasitholile ngenxa yemidlalo ye-africa Cup of Nations (Afcon), sizobasebenzela kakhulu unduduzo “Sulu” Sibiya (osesithombeni), ongukaputeni welamontville Golden Arrows ezogadulisana nemamelodi Sundowns kowedstv Premiership ngolwesithathu ngo19h30 empumalanga Stadium, ehammarsdale.
Imidlalo ye-afcon izosongwa ngesonto e-ivory Coast.
Usibiya ekhuluma nabezindaba ngaphambi kwalo mdlalo, uthe ukuthola leli khefu kubalekelele kakhulu kwazise imidlalo ibisondelene kakhulu obekwenza izinto zibuye zingenzeki ngendlela abafisa ngayo emzuliswaneni wokuqala.
“Izinhlelo zethu zihamba kahle kakhulu futhi sinethemba lokuthi sizobuya sesingcono kakhulu kunakuqala. Ngeke nangengozi sididiswe yilaba abathi sizodlala nabadlali bedowns abangajwayele ukudlala.
“Laba bantu banalo lonke uhlobo lomdlali, ngalokho-ke ngeke nangengozi size sizikhohlise, sizitshele ukuthi sizodlala nabantu ababuthaka. Okwethu nje wukuya enkundleni ngethemba lokuwaqoqa wonke amaphuzu,” esho.
Abasho lokhu bakususela ekutheni ukhilimu wabadlali besundowns use-ivory Coast njengoba uhambe nebafana Bafana ezobanga indawo yesithathu nedr Congo namuhla ngomgqibelo ngo22h00.
Cishe yisikimu sonke sedowns esikhande ibafana kulo mqhudelwano.
Umqeqeshi we-arrows umabhudi Khenyeza uthe kubajabulisa kakhulu ukusayinisa abadlali abasha ukuqinisa le kilabhu.
“Nginethemba lokuthi sizokwenza kahle njengoba sithole nabadlali abasha futhi abanesipiliyoni. Okuhle nje wukuthi sesibe nesikhathi eside sindawonye futhi kangingabazi ukuthi sizokwenza kahle emidlalweni yethu.
“Sizoya emdlalweni wedowns ngenhloso yokuwathatha wonke amaphuzu, ukuthi ngubani ozokube engekho kasingeni ngoba ibhola liyefana, okumele sikwenze nje wukugxilisa imiqondo yethu kwesikwenzayo. Kithina kakusho lutho ukuthi sidlalela kuphi, okumqoka nje wukuqoqa amaphuzu,” esho.
Kuzokhumbuleka ukuthi womabili la makilabhu athola isipho sikakhisimusi nyakenye ngenkathi egixabezwa ngamaphuzu amathathu ahambisana namagoli amathathu ngokwahlukana emuva kokuba abadlali beswallows bathunywa eniniva bona bashona entalashishi kuyona yomibili imidlalo ababezoyigijima nala makilabhu okwenza bahlawuliswa kanzima ngokudicilela phansi isithunzi seligi ngokungalubhadi enkundleni ngoba bekhala ngokungaholelwa.
Isiyonke imidlalo yokuqala umzuliswano wesibili wedstv Premiership imi ngalolu HLOBO:NGOLWESIBILI
E-DHL Cape Town Stadium: Cape Town City FC vs Moroka Swallows 19h30.
Elucas Masterpieces Moripe Stadium: Supersport United vs Sekhukhune United 19h30.
Epeter Mokaba Stadium: Kaizer Chiefs vs TS Galaxy 19h30.
E-orlando Stadium: Orlando Pirates vs Chippa United 19h30.
Edanie Craven Stadium: Stellenbosch vs Amazulu 19h30.
NGOLWESITHATHU Empumalanga Stadium: Golden Arrows vs Mamelodi Sundowns 19h30.
Eharry Gwala Stadium: Royal AM vs Cape Town Spurs 19h30.
E-old Peter Mokaba Stadium: Polokwane City vs Richards Bay 19h30.