Ibafana isizolwela isithunzi kwi-afcon
Ukaputeni uveza ubuhlungu ababuzwile bedliwa yinigeria
IZOLWELA ukugcina isithunzi seningizimu Afrika siphezulu kunobhutshuzwayo ibafana Bafana njengoba ifuna ukubuya nethusi emqhudelwaneni wecaf Africa Cup of Nations (Afcon) e-ivory Coast.
Ukuze abadlali bebafana bagibele ezitebhisini zabazohlonishwa ngezindondo kulo mqhudelwano, kumele bahlule IDR Congo namuhla ngomgqibelo ngo-22h00.
Umdlalo wamanqamu uzogijinywa ngosokhaya ithe Elephants nesuper Eagles yasenigeria kusasa ngesonto ngo-22h00.
Ukaputeni webafana uronwen Williams uthi nakuba beguqe kungafanele * kwinigeria ebashaye ngo-4-2 wamaphenathi ngolwesithathu ebusuku, kepha indlela abalandeli baseningizimu Afrika abakhombise ukubeseka ngayo izokwenza bazimisele ngokuphindiwe ukubesula izinyembezi ngokubuya nezindondo zethusi.
Uthe bazizwa bethobekile ngothando lwabathandi bebhola bakuleli.
“Okwenzeke emdlalweni wenigeria sesikudlulisile.
“Sizimisele ngokulwela ukugcina isithunzi sethu kulo mdlalo wecongo.
“Kubalulekile ukuba siziqophele owethu umaka.
“Balwile abadlali bethu kulo mqhudelwano, futhi ngiyaziqhenya ngabo, yize sigcine singakwazanga ukufinyelela kowamanqamu.
“Okuhle wukuthi sesikwazile ukuphumuza imiqondo.
“Bonke abadlali sebelinde usuku lwalo mdlalo, bangene enkundleni benze abadume ngakho.
“Ngiyazi ukuthi icongo nayo iyizwe eliqinile, elilwela ukufeza izinhloso zalo, kepha kasizimisele ngokuphoxa abalandeli bethu kulo mdlalo,” kusho uwilliams.
Uhugo Broos, ocija ibafana, uthe yize ephoxekile ngokuguqiswa yinigeria kodwa uyayivuma induku.
Uthe uyaziqhenya ngendlela abadlali bakhe abaziphathe ngayo kulo mqhudelwano.
“Yebo ngiyavuma isidlile inigeria kepha sidlale kahle. Abadlali abaningi benze ngazigqaja ngabo,” kusho ubroos.