Uchaza 'ngokushiya' umkhokha ukhoza
Ubonga umdidiyeli ngokumnika ithuba engenaso isipiliyoni
UPHUMELA obala ngokushiya kwakhe emdlalweni kamabonakude, Umkhokha: The Curse, umbuso Khoza, ngemuva kokuqubuka kwezinkulumo zokuthi uwushiye ngenxa yokungaboni ngaso linye noduma kandlovu, ongumdidiyeli wawo.
Kulo mdlalo okhonjiswa kuchannel 161 ngo-20h30 phakathi nezinsuku, ukhoza ubedlala indawo kamaphalala.
Akukhona okokuqala eshiya kulo mdlalo njengoba enza phambilini, endaweni yakhe kwangena ulangalakhe Zwane, odume ngelikamangethe.
Ukhoza uthi kungamampunge ukuthi ushiye Umkhokha ngenxa yokungaboni ngaso linye abe nakho nondlovu, uthi isizathu wukuthi kuphele inkontileka abebemnike yona.
“Kubalulekile ukuba singajahi ukubona ingxabano nalapho ingekho khona, ikakhulukazi ezintweni ezinjengalezi ezinezinkontileka phakathi.
“Akekho umuntu ongazi ukuthi ukuphela kwenkontileka kusho ukuthi sesiphelile isikhathi sakho lapho, kayikho into exabanisayo kulokho,” kusho yena.
Uthi uyakuqonda ukuthi kungenzeka ukuthi abadidiyeli bangayivuseleli inkontileka yakhe ngoba bayazi ukuthi ungumuntu omatasa ngomculo.
“Ngiyacabanga ukuthi babuke lokho, kodwa uma kukhona elinye ithuba elingavela lokulingisa, ngingalithatha.”
Ubonga uduma ngokumnika ithuba lokulingisa, engenaso nesipiliyoni.
“Bengingaqali ukusebenza naye njengoba sike sasebenza kwimbewu, okuyilapho angitshela khona ukuthi kuzoba nomdlalo omusha umkhokha: The Curse.
“Wabe esengicela ukuba ngibenzele nebika lalo mdlalo.
“Lokho kusho ukuthi noma ngabe kangisalingisi kulo mdlalo, kodwa izingane zami zizolokhu zinakho ezihlomula ngakho kulo mdlalo.”
Ngemuva kokusabalala kwezikhalazo zabaningi ezinkundleni zokuxhumana, ukhoza ubhale ku-instagram wakhe wathi: “Ngibheke amathuba amasha, uma eqhamuka, ngizowathatha ngezandla zombili kodwa okwamanje ngibonga ithuba lokukhombisa ngethalente ebengangingazi ukuthi nginalo.”
Ukhoza ungomunye wabantu abaziwa ngokuba ngumbele ogwansile uma kukhulunywa ngomlando, umculo namahubo akwazulu.
Ungomunye wabaculi ababhale umculo ohlasimulisa umzimba, uvuse usinga, emdlalweni ushaka Ilembe.
Ubephinde abe nobudlelwano obukhulu nomsunguli WE-IFP inkosi Mangosuthu Buthelezi, okhothame ngomandulo (September) wangonyaka odlule.
Ukhoza uthi usanda kuqopha neqembu lakhe Ijadu le Afrika, i-albhamu enamahubo akhuluma ngamakhosi akwazulu ayisikhombisa, ngokulandelana kwawo.
“Kuphinde kube nengoma ekhuluma ngomphrofethi Isaiah Shembe owasungula ibandla lamanazaretha ngonyaka ka-1910,” kusho yena.
Umatasa nangomncintiswano wamakhwaya azocula amahubo akwazulu, okuyobe sekukhethwa kuwona, kwakhiwe iqembu elilodwa elizokwaziwa ngokuhuba lawa mahubo.
Uthi kubo Eshowe usesivulile isiza lapho kuzokwakhiwa khona isikole sakhe, imbuso Khoza Insitute for Culture, lapho kuzobe kufundwa khona ngomculo, umlando wakwazulu, ulimi lwesizulu nomlando womhlaba.