BANOVALO BEPHUCWA AMAPHOYISA ABETSHALWE UKUBAGADA
KUNOVALO lokuthi kungase kuvuke umkhuba wokuntshontshwa kwezimoto zaseningizimu Afrika, ziweliswe umngcele ohlukanisa elakuleli nelasemozambique, emanguzi, Kwamhlabuyalingana.
Izolo ngolwesihlanu umnu Joseph Ngubane ongusihlalo wekomidi lezokuphepha emkhanyakude, uthe lukhulu uvalo kubanikazi bezimoto endaweni ngenxa yokwephucwa amaphoyisa abetshaliwe, abebavikela.
Ungubane uthe iningi lawo lithathwe ngaphandle kokuba kuxhunyanwe nabo bewuphiko lwezokuphepha endaweni. Ukhale ngokuthi ukungabonakali kwawo ezindaweni abejwayele ukuba kuzona, kuzokwenza ukuthi izigilamkhuba ziqhubeke nokuntshontsha izimoto.
Uthe inkinga wukuthi izigilamkhuba ziyabulala futhi zinukubeza abesifazane nezingane. “Amaphoyisa abetshalwe kule ndawo awenzile umehluko emphakathini ngoba kumanje sekuyohlangana unyaka sithola ukuphefumula. Indawo yasemkhanyakude idume ngokuba yisizinda sobugebengu bokwebiwa kwezimoto.
“Lokhu kwenza ukuthi lesi sifunda sigcine sesishalazelwa ngabatshalimali. Ngeke sikwazi ukuhlala sithule nje ngokuthi kuthathwe amaphoyisa abewusizo.
“Ngesikhathi ezokwethulwa endaweni, satshelwa ukuthi azohlala lapha impilo yawo yonke. Sakushayela izandla lokho ngoba kudala sikhala ngokuthi kufanele kwandiswe isibalo sawo ngoba kunezintuba eziningi zokungena nokuphuma kwezigebengu.
“Kuyishwa ukuthi bathatha la maphoyisa abevundulula ngisho amacala eminyaka. Esinye isikhulu samaphoyisa singifonele, sathi sisendleleni, siyalelwe ukuba siyosiza ekapa nakhona kuhlasele ubugebengu.
“Bekufanele uma esuswa kube wukuthi kukhona asalayo eqaphe le ndawo esikuyona.
“Ungqongqoshe wamaphoyisa nohulumeni wakuleli ngeke basitshele ukuthi amaphoyisa ayashoda ngoba ziningi izingane ezihlala ziyofuna lo msebenzi kodwa bengaziqashi.
“Kabakwazi bona ukuthi bangathatha amaphoyisa ekubeni lungakaqali ngisho nohlelo lokwakhiwa kodonga ababelwakha eminyakeni
eyedlule. Okubi nje waukuthi emuva kwalokho babuya sebesitshela ukuthi kwadliwa imali yokwenza umsebenzi,” kusho ungubane.