Kuboshwe owesifazane 'oshaye uthisha'
Kuthiwa uthisha ufundisa izifundo ezibucayi kanti kuningi awusizo ngakho kulesi sikole
UZINIKELE esiteshini samaphoyisa Kwaceza, olundi owesifazane ongene nezicabha ngezithuba zasemini ngesonto, egezinsila Secondary School. Umsolwa elingeke lidalulwe igama lakhe kuze kube uvela enkantolo kuthiwa wakhwela wadilika ngenduku kuthisha obefundisa ikilasi likamatikuletsheni ngempelesonto.
ILANGA Lempelasonto linazo izithombemnyakazo (videos) ezikhombisa ukuthi silimale kangakanani isisulu.
Ngokusho komthombo waleli phephandaba uthi udaba lusuke ngomfundi wesifazane ongowokufika kule ndawo.
Kuvela ukuthi lo mfundi ufike kule ndawo eminyakeni emithathu eyedlule. Kumanje ufunda umatikuletsheni kanti kunesikhalo sokuthi yena nabanye bayalova esikoleni nokugcine sekuholela ekutheni banikwe imiyalelo yokuba bafike nabazali babo.
“Lo mfundi akafikanga nomzali kunalokho uthathe owesifazane owaziwayo endaweni ukuthi uyisiqhwaga. Lo mfundi ubengeke afike nabazali ahlala nabo ngoba bangabantu abaphila impilo eqondile futhi kabayivuni ingane uma inephutha.
“Ihlala nomshumayeli kodwa iyanyantisa indlela ecwila ngayo ezinkambeni zikafaro. Nakusona lesi simo ithathe umuntu echitha naye isikhathi esiningi begila yona le mikhuba engalungile.
“Okubuhlungu lo muntu ushaye uthisha owusizo ezinganeni zethu. Uthisha ubezobhalisa abafundi iphepha lokuhlolwa kwabo, okuthe uma efika lona olovayo wangamnika iphepha lokubhala ngoba elandela umyalelo okuvunyelwene ngawo esikoleni wokuba banganikwa amaphepha okubhala abafundi abebengekho kufundwa,” kusho umthombo.
Umnu Gugulesizwe Mlaba (oyilungu lomphakathi) uthe udaba lokuhlaselwa kukathisha selungenwe nangamalungu omphakathi. Uthe uthisha uvule icala.
“Lo mfana uqale ukufundisa kulesi sikole engaholelwa lutho kwaze kwaba siyokhuluma udaba lwakhe emahhovisi omnyango emgungundlovu. Njengoba izwe libhekene nenkinga yokucishwa kukagesi kodwa lapha kwaceza izingane zethu ziyaqhubeka nokufunda ngenxa yakhe lo thisha ngoba uyaye asebenzise i-generator yakhe ngenhloso yokuba kukhanyiswe
esikoleni. “Nayo injini esebenzayo idunyiswa
ngophethiloli wakhe. Kumanje udubile uthe ngeke esakwazi ukuqhubeka nokufundisa ngoba ushayiwe. Isikole usigundela utshani ngomshini wakhe. Ufundisa izifundo ezibucayi kakhulu okuyimaths ne-accounting.
“Ngasohlangothini lwethu singamalungu omphakathi kasimdingi umuntu owenza njengoba kwenze lona wesifazane. Sizonikela enkantolo ngenhloso yokuba siphikisane nokudedelwa kwakhe. Asifuni nje nokuthi anikwe ibheyili ngoba nasemphakathini unegama elibi,” kusho umlaba.
ILANGA Lempelasonto lizamile ukuthola ukuphawula komnyango wezemfundo Kwazulu-natal kwangalunga. Umnu Muzi Mahlambi ucingo lwakhe belukhala lungabanjwa. Umyalezo athunyelelwe wona uwufundile kodwa wangawuphendula kwaze kwashaya isikhathi sokushicilela.
Okhulumela amaphoyisa Kwazulu-natal ult-col Robert Netshiunda akatholakalanga nemibuzo athunyelelwe yona ngalolu daba akayiphendulanga kwaze kwashaya isikhathi sokushicilela. phumlani@ilanganews.co.za