ULWA NESIHLAVA SABAYEKA ISIKOLE NGENXA YOKWESWELA
ILWELA ukuqeda isihlava sabafundi abashiya isikole ngoba beswele, bezibona behlukile kwabanye imeya yomasipala inkosi Langalibalele, emtshezi, umnu Mduduzi Myeza.
Kuleli sonto ibiqhuba umkhankaso wayo wokuhambela izikole zakule ndawo, igqokisa abafundi abaswele imifaniswano yesikole.
Itshele ILANGA Lempelasonto ukuthi kayifuni kube nomfundi ozibona ehlukile kwabanye, aze azenyeze nokuya esikoleni ngenxa yosizi lwakubo.
Ikusho lokhu ihambele iweenen Combined School, ngolwesine.
Phakathi kwezikole umyeza asezihambelile eyonikeza abafundi imifaniswano yesikole, kubalwa imthaniya Combined, isiphokuhle High, imhubheni High, ibhekundi High, idrankensburg High, impumelelo High, imasimbonge High, iwembezi Secondary, ishayamoya High, inkomokazini High, ikhandimfundo Secondary nezinye.
Uveze ukuthi uzozihambela zonke izikole zamabanga aphakeme zakule ndawo, eziwu-42.
“Nakuba singenakho okutheni, kodwa sikholelwa ekuthini lokho okuncane esikuhambisa ezikoleni kuyowenza umehluko kwabanye abantwana abentulayo.
“Ngikhule ngeswele nami, ngiyazazi izinkinga ezibhekana nomfundi oxakekile ngenxa yesimo sakubo.
“Kuyenzeka kwezinye izikhathi ingane iyeke ukufunda, ilahle ithemba ngoba usizi lwakubo luvele obala kwabanye.
“Ngakho-ke ngizama ukuhlangabezana nabazali,” kusho umyeza.
Uthi ukholwa wukuthi imfundo yiyona eyokwenza umehluko omkhulu emindenini eminingi, ikakhulukazi exakekile.
Uveze ukuthi uhlelo lwakhe lokunikelela abafundi abaswele,
luzoya nasezikoleni zamabanga aphansi.
“Akusizi ukuthi sihlangane nabafundi sebephumelele umatikuletsheni, singazange sihlangabezane nezimo zabo besafunda esikoleni.
“Sizimisele ukwenza umehluko omkhulu ezikoleni zakule ndawo, ikakhulukazi ezimpilweni zabafundi,” esho.
Uncome othisha abasebenza ngokuzikhandla ukukhiqiza imiphumela emihle.
Othisha abakhiqize imiphumela, emihle nyakenye ubakhuthaze ngezipho.
“Kufanele ngabe othisha bahola kahle ukwedlula bonke abantu kulelizwe, ngenxa yomsebenzi abawenzayo.
“Ingane ifika esikoleni ingakwazi nokubhala igama layo, basebenze kanzima othisha, ingane iqede isikole isikhipha isingisi ngamakhala.”
Utshele abafundi ezikoleni ukuthi uma bezozimisela, ubabekele umklomelo welaptop labo abazophasa kahle imaths nesayensi esigabeni sesibili sonyaka, ngonhlangulana (June).
“Asigcini ngokukhuthaza kuleli zinga kuphela, uma sebephumelele abafundi kumatikuletsheni, siyabanikeza imali yokuyobhalisa emanyuvesi ukuze bezoqhubeka nemfundo, babe nekusasa eliqhakazile.”
Uthe abafundi mabazimisele manje ngoba kawukho umlingo abazowenza ekupheleni konyaka.
Othishanhloko bezikole bancome uhlelo lokwesekwa kwabafundi ngemifaniswano nolokubakhuthaza ukuphasa kahle.