Usizwe wulwazi aluncela E-USA esanda kuqeda enyuvesi
'Izinkampani kuneqhaza okumele zilibambe ukufukula imiphakathi'
UKUQOKWA njengesikhulu emnyangweni wokuzokhangisa enkampanini ekhiqiza izinkwa, ngezinye zezinto ayezifisa unkz Nomsa Khanyile (43) oyimarketing Director kwasasko.
Uthi lumsizile ulwazi alucosha enkampanini yase-united States of America (USA) ngemuva kokuqeda enyuvesi.
Unkz Khanyile ungowokuzalwa esoweto kodwa usezinze elanseria, khona egauteng.
Uthi akakhohlwa lapho inkaba yabazali bakhe ikhona njengoba bengabaseshowe.
Le ntokazi izwakala ngisho ikhuluma ukuthi iyaziqhenya ngemvelaphi yayo njengoba ikhuluma isizulu esome nkwe, ngeke usho ukuthi kayikhulelanga Kwazulu-natal.
UBEYILUNGU LENHLANGANO YABAFUNDI ABAPHUMA EMAZWENI ANGAPHEZULU KUKA-80
Unkz Khanyile uthi ukuqokwa njengemarketing Director yakwasasko, ngaphansi kwenkampani enkulukazi ipepsico - ngaphansi kwayo okukhona imikhiqizo yakwasimba, iwhite Star, isasko, ipepsi neminye – kuwukufezeka kwephupho lakhe.
Wenze izifundo zebachelor of Social Sciences erhodes University, emakhanda, e-eastern Cape, ngemuva kokuphothula umatikuletsheni eroseleigh Girls’ High, egoli.
Uthi ngesikhathi efika erhodes, waba yilungu lenhlangano ehlanganisa abafundi abaphuma emazweni ahlukene, i-international Association of Students in Economics and Commercial Sciences (IAESEC), okwagcina kumvulela amathuba.
Uthi le nhlangano ihlanganisa abafundi abaphuma emazweni angaphezulu kuka-80, okuyilapho becobelelana khona ngolwazi, kuphinde kube namathuba okuyoncela ulwazi nakwamanye amazwe.
WATHOLA ITHUBA LOKUYONCELA ULWAZI E-USA ESANDA KUQEDA ENYUVESI
“Mina ngibe senhlanhleni yokugcina ngingusihlalo wale nhlangano kuzwelonke ngemuva kokuqala ngokuba ngusihlalo kusona lesi sikhungo.
“Ngithe sengenza unyaka wokugcina, ngaba nenhlanhla njengoba kube nenkampani eyaziwayo emkhakheni wezemishwalense eyanginika ithuba lokuyocosha ulwazi E-USA, imarsh and Mclennan.
“Kule nkampani ngisebenze njengeresearch Analyst iminyaka emibili, ngabe sengibuyela kuleli,” esho.
Usebenzele ezinye izinkampani ezinkulu zokudla kwathi ngonyaka odlule waqokwa njengomqondisi wezokukhangisa kwasasko.
Uthi isasko ngelinye lamagama aziwa kakhulu eningizinu Afrika ngoba izinkulungwane zidla izinkwa zabo nsuku zonke.
UYAZIQHENYA NGOHLELO LWAKWASASKO LOKWAKHELA IZINGANE IZINDAWO ZOKUDLALA
Uthi kulesi sikhundla uyaziqhenya kakhulu ngohlelo abalusungule ngonyaka odlule olubizwa ngokuthi ngesiyazama, lapho abakwasasko behambela khona izindawo ezahlukene, bakhe izindawo zokudlala izingane ezineminyaka engaphansi kweyishumi.
“Ngokocwaningo esilwenzile, sithole ukuthi kunezingane eziningi ezingenazo izindawo eziphephile zokudlala.
“Lokhu kuyadabukisa ngoba ngokwezempilo, kubalulekile ukuba izingane zidlale ukuze zikhule kahle. Ukudlala yisigaba esibalulekile ezinganeni.
“Siqale lolu hlelo ukuze izindawo ezehlukene, ikakhulukazi ezisemakhaya nasemalokishini, zizokuba nezindawo eziphephile lapho izingane zingadlala khona.”
BANXENXA IZAKHAMIZI UKUTHUMELA IZINDAWO ABAFISA ZAKHELWE, IKAKHULUKAZI IZINKULISA
“Sinomkhankaso lapho sinxenxa khona izakhamizi zakuleli ukuba zithumele amagama ezindawo ezifisa ukuba sakhe kuzona izindawo zokudlala zezingane eziphephile.
“Sifisa ziqoke ikakhulukazi izinkulisa ezingenazo izindawo zokudlala, nezikole zamabanga aphansi lapho kunezingane ezineminyaka engaphansi kweyishumi.
“Emuva kwalokhu kuzokube sekuqala uhlelo lokwakhiwa kwalezi zindawo kanti ngozibandlela (December) sifuna ukuthi sibe sesakhe eziyinkulungwane.”
Uthi kuyamjabulisa ukusebenzela inkampani ekwazi ukwenza izinhlelo ezinjengalezi ukubuyisela emphakathini.
BANOHLELO LOKUNAKEKELA IZISEBENZI ZABO NAMAKHASIMENDE
“Kuba kuhle kakhulu uma inkampani ikwazi ukubuyisela emphakathini ngalolu hlobo.
“Esasko sinohlelo esiluchaza ngokuthi siyakuthanda ukunakekela, kusukela ezisebenzini zethu ezibhaka izinkwa, kuya kubashayeli abavuka ngovivi behambisa izinkwa ezindaweni ezahlukene, kanjalo nabathengi bethu abathembekile.
“Noma umsebenzi wethu kuwukudayisa izinkwa kodwa kubalulekile kithina ukubuyisela emphakathini ngoba kakuwona nje umsebenzi kahulumeni kuphela ukwenza umehluko emiphakathini yakithi.
“Nezinkampani ezizimele kumele kube khona ezikwenzayo, ikakhulukazi ekushintsheni impilo yezi ngane njengoba ziyikusasa laleli lizwe.”
INDLELA YOKUKHETHA ISIKHUNGO OFISA SAKHELWE INDAWO YOKUDLALA
Umkhankaso usuvuliwe kanti uzovalwa ngomhla ka-30 kumbasa (April).
Ukuba yingxenye yawo, abantu banxuswa ukuthenga imikhiqizo yakwasasko – okubalwa kuyo isinkwa, amabhanisi nama-rolls – bese bethumela ngewhatsapp noma ngokuthwebula IQR Code, igama lesikole noma inkulisa edinga ukwakhelwa indawo yokudlala yezingane. Ngokwenza lokhu ungaphinde uzibeke ethubeni lokuwina imali ewu-r5000. Ngeminye imininingwane kuvakashelwa i-website yakwasasko ku:
Ngokwezempilo kubalulekile ukuba izingane zidlale ukuze zikhule kahle.