Ubaba wendawo wambonisa imfihlo yokukhiqiza uju lwezinyosi
Ubonga nophiko lwasedut olucobelela osomabhizinisi abafunde kulesi sikhungo ngolwazi lwamabhizinisi
KUYASIZA ukuqala ibhizinisi ngokuncane onakho ngethemba lokuthi lizochuma, ungalindi ukuthi uze ube nakho konke okudingayo. Kube njalo nakunkz Thembelihle Mathaba esungula ithothelihle Bee Farming, okuyinkampani ekhiqiza uju lwezinyosi isebenzisa indlela eyehlukile futhi engabizi.
Unkz Mathaba wakwesakwamthethwa, empangeni, enyakatho yekwazulu-natal, uthi isinqumo sokuqala ibhizinisi elinje wasithatha ngo-2020 ngesikhathi kufika ubaba othize endaweni yangakubo, okutholane imimoya yabo.
“Lowo baba ngowakwamthethwa isibongo, wafike waxoxela ubaba ngokuthi uyakwazi ukwenza ikhekheba lezinyosi ngendlela elula nesiza ukudonsa izinyosi zizozalela kulona bese kwakheka uju olungaxutshwe nalutho,” esho.
WENZA I-ADVANCED DIPLOMA IN HUMAN RESOURCES EJALIMANE NGO-2022
Ngaleso sikhathi wayenza unyaka wesibili wediploma in Human Resources, edurban University of Technology (DUT), kuthi uma ebuyile kubo, alekelele uyise nomngani wakhe kulo msebenzi ababewenza ‘ukuchitha isizungu’.
“Ngiqale kanjalo ngifunda kubona ukuthi kwenziwa kanjani ukuhlanganisa ikhekheba lezinyosi, esilifaka ebhokisini esilenza ngekhadibhothi bese sililengisa
esihlahleni esisehlathini elingasekhaya ukudonsa izinyosi,” esho.
Le ntokazi, eyenza i-advanced Diploma in Human Resources ejalimane ngo-2022, ngaphambi kokubuya izoqhubeka nehonours EDUT, ithe kubathatha izinyanga ezintathu kuya kweziyisithupha ukuvuna uju lwezinyosi.
LUBIZA U-R75 IBHODLELA ELIWU-500ML NO-R1 700 U-20 LITRE
“Sijabula sodwa uma sekuyisikhathi sokuluvuna ngoba baningi kakhulu abantu abalufunayo futhi luhlale lushesha ukuphela ngenxa yokuthi lusetshenziselwa izizathu ezahlukene; kungaba wukuludla, wukulusebenzisa ukususa amabala ebusweni nokwelapha umkhuhlane. Kukhona nabalimi abaluthenga kithina bese bezidayisela lona,” kulanda unkz Mathaba.
Uma sebeluvunile balubiza u-r75 ibhodlela eliwu-500ml no-r1 700 u-20 litre. Yize zingeziningi izinselelo ababhekana nazo kuleli bhizinisi kodwa okuvamise ukuba yinkinga yizingane eziganga lapho besebenzela khona.
UFISA UKWENZA IMIKHIQIZO EHLUKENE NGOJU ABALUKHIQIZAYO
“Kuyenzeka izingane ezazi lapho esigcina khona ikhekheba lethu ziyoganga bese zitinyelwa yizinyosi nokuthi okwamanje kasikakwazi ukwenza umkhiqizo omningi ekubeni bebaningi abafuna uju lwethu,” esho.
Unkz umathaba, obhalisele ukwenza imaster's in Human Resources EDUT kulo nyaka, ubonge kakhulu IDUT Innobiz, okuwuphiko olucobelela osomabhizinisi abafunde kulesi sikhungo ngolwazi lwamabhizinisi, athi lumsize ukufukula ibhizinisi lakhe.
“Manje sengibheke ukuqhubeka nokukhulisa ibhizinisi lami, ngigcine sengenza imikhiqizo ehlukene ngoju lwezinyosi engilukhiqizayo,” kuphetha yena.
* Lolu daba luqale lwashicilelwa ku: www.umbele.co.za
ifacebook: Thembelihle Nontobeko Mathaba