Abahlaziyi bezomnotho baqagula ukwenyuswa kwemali yentela
Kungenzeka ungqongqoshe ayenyuse kancane imali ewu-r350 yesibonelelo sabangasebenzi
KUQAGULWA ukuthi kungenzeka ungqongqoshe wezemali umnu Enoch Godongwana, amemezele ukwenyuswa kwezintela ngolwesithathu ziwu-21 kwephezulu, uma esethula inkulumo yesabelomali sikahulumeni sonyaka omusha u-2024/2025.
Ngokusho kwepwc embikweni wayo ohlanganiswe ngochwepheshe bale nkampani unkk Lullu Krugel oyichief Economist, nomnu Kyle Mandy oyitax Policy Leader, ukuze uhulumeni ukwazi ukukhuphula ngo-r15 billion
isamba semali yentela ezoqoqwa kulo nyaka omusha, kuzodingeka unyuse intela ekhokhwa ngamabhizinisi, yizisebenzi noma intela ekhokhwa ngabathengi ezitolo.
Phambilini uhulumeni uzibekele umthwalo wokuthi ufuna ukukhuphula isamba sentela ezoqoqwa kulo nyaka ngo-r15 billion
ngaphezulu.
Nokho ngaleso sikhathi ememezela lokho ugodongwana, akacacisanga ukuthi yiziphi izindlela uhulumeni ozozisebenzisa ukukhuphula imali yentela ngalo R15 billion.
Nakuba wakubalula ukuthi ukwenyuswa kwezintela kulesi simo somnotho esingesihle kungaba nzima, kodwa IPWC iqagula ukuthi ukuze uhulumeni ukwazi ukukhuphula imali yentela eqoqwayo, kuzomele uzenyuse izintela.
I-PWC ithi ukukhushulwa ngor15 billion kwemali yentela kuzodinga ukuba kwenyuswe ekhokhwa ngamabhizinisi, phecelezi i-corporate tax ngo-1,4% iye ku-28%, kukhushulwe intela ekhokhwa yizisebenzi, phecelezi i-personal income tax (PIT) ngo-0,5% noma kwenyuswe intela ebanjwa ezimpahleni ekhokhwa ngabathengi, ebizwa phecelezi nge-value added tax (VAT) ngo-0,5% okuzoyenza yenyukele ku-15,5%.
Ukwenyuswa kwezintela, ikakhulukazi kwaleyo ekhokhwa yizisebenzi NEVAT akuvamisile ukuba kuthokozelwe ngabantu, futhi kuye kuholele ekutheni uhulumeni ugxekwe kakhulu, usolwe ngokungabacabangeli abantu abathwele kanzima kulesi simo somnotho.
Esabelwenimali sango-2018, umnu Malusi Gigaba owayengungqongqoshe wezemali ngaleso sikhathi, wamemezela ukwenyuswa kwevat ngo-1%, lokho okwayisusa ku-14% yakhuphukela ku-15%.
Saba sikhulu isikhalo ngaleso sinqumo, futhi wagxekwa kakhulu uhulumeni ngokungawucabangeli umphakathi othwele kanzima.
I-PWC ithi iyakholwa wukuthi ukwenyuswa kwevat kunokwenyuswa kwepit kungaba yisizathu esizwakalayo ngenxa yokwelulwa kwesikhathi sokuholwa kwesibonelelo sabangasebenzi, u-r350, esibizwa phecelezi nge-social
relief of distress grant (SDR).
Kuyo le ndaba YESDR, IPWC iqagula ukuthi kungenzeka ukuba ugodongwana amemezele ukwenyuswa kancane kwalo R350.
Ngonyaka owedlule uhulumeni umemezele isinqumo sokuqhubeka nalesi sibonelelo kuze kube wundasa (March) 2025. Ngokusho kwepwc, okusobala wukuthi uhulumeni awukakabi naso isiqiniseko sokuthi yisiphi isixazululo saphakade ngendaba yalesi sibonelelo.
Mayelana nesiphakamiso sokuba lesi sibonelelo sesikhashana siguqulwe sibe yisibonelelo esimileyo esibizwa phecelezi nge
basic income grant (BIG), IPWC ithi inselelo wukuthi lizonqunywa libe wubani inani lale BIG, nokuthi izophumaphi imali yokuyixhasa (BIG) njengoba uhulumeni usenkingeni yemali.
Maqondana nentela yemikhiqizo kawoyela, phecelezi i-fuel levy, ebanjwa kuphethiloli nodizili, kuzokhumbuleka ukuthi eminyakeni emibili edlule uhulumeni awukaze uyenyuse le ntela ngenxa yokukhuphuka kakhulu kwentengo kaphethiloli okukhalise kakhulu umphakathi.
Ngeshwa IPWC ithi uhulumeni kawukho esimeni sokuqhubeka nokwenza umusa wokungayenyusi le ntela.
“Njengoba sekube nozinzo entengweni kaphethiloli, kulindeleke ukuba uhulumeni uphinde uqale ukwenyuswa kwentela kaphethiloli kwaminyaka yonke. “Ngakho-ke kwisabelomali sika-2024, kulindeleke ukwenyuswa kwentela kaphethiloli okuhambisana nezinga lamandla emali,” kusho IPWC embikweni.