Libukeka liqhakazile ikusasa lebafana Bafana ebholeni
MHLELI: Ngifisa ukubongela iqembu lesizwe likanobhutshuzwayo lakuleli, ibafana Bafana ngokubuya nendondo yethusi kwicaf Africa Cup of Nations (Afcon) esongwe ngesonto inqotshwa yithe Elephants yase-ivory Coast, iguqisa ngo-2-1 isuper Eagles yasenigeria kowamanqamu.
Ibafana ibuye nethusi emuva kokuqumba phansi IDR Congo ngo6-5 wamaphenathi emdlalweni obungomgqibelo ebusuku wokubanga indawo yesithathu. Leli qembu elilolongwa nguhugo Broos wasebelgium - lisimangazile cishe sonke kuleli ngoba belihambe lingethenjwa nakancane lilibangisa kule midlalo.
Impela sibaningi ebesilibeka ngesihloko elokuthi lizobuya ekuseni kule midlalo. Namuhla amathe abuyele kwasifuba kithina sonke, sesiyaziqhenya ngalo.
Phela ngaphandle nje kokuthi lilale isithathu, lidlale ingcwenga yebhola ikakhulukazi esigabeni somkhumulajezi kusuka liwashisa ijezi imorocco ngo-2-0 kwi-last 16, likhipha icape Verde ngo-4-2 wamaphenathi kuma-quarter final kanti sabhema sakholwa nangesikhathi lehlulwa yinigeria ngamaphenathi kuma-semi final ngebhola elihle esehlulwa silidlala.
Uma ibafana izoqhubeka nokudlala ngalolu hlobo, ngineqholo lokuthi izokwazi ukungena emidlalweni yendebe yomhlaba ezokuba ngo-2026 e-united States of America,
ecanada nasemexico. Nakule midlalo ingakwazi ukuhamba ibanga elide njengoba kwenze imorocco iba yizwe lokuqala ukuphuma kuma-semi final ngo-2022 eqatar.
Nokho kuyomele umgogodla weqembu ebelisimele kwi-afcon ugcinwe, isikwati sithakwe lapha nalaphaya ikakhulukazi kubagadli okuyingxenye esishodayo kuyona.
Phela ukuqina kwesikwati sethu kubonakale nangokufakwa kukaronwen Williams ongunozinti noteboho Mokoena esikwatini sabadlali abawu-11 abebevelele kule Afcon.