NGIFISA UKWAZI UKUTHI ICHAZANI I-VALENTINE'S DAY KWABAMPISHOLO

MHLELI: Ngifisa ukusika elijikayo ngosuku lwezibomvu ivalentine’s Day ebingolwesithathu esiphuma kulona.

Amaphephandaba esizulu abhalile ngalolu suku ngaphambi kokuba lufike kodwa awesilungu engiwafundile kawashongo lutho.

Mhlawumbe azobhala njengoba seludlulile. Kokunye kuyaye kube kuhle uma ugubha usuku oluthile okanye umkhosi othile, uthole ukuthi kwakuyini incazelo yawo noma kwakwenzekani ngalowo mkhosi kumbe ngalolo suku.

Inkosi Claudius 11 eyayibusa erome, e-italy, yayingafuni ukuthi izinsizwa zigcagcelwe zisencane, yayithi kusamele zilwe izimpi kuqala zize ziqine.

Umfundisi ST Valentine owayethanda kakhulu izingane, wayezishadisa isinyelela. Wagcina ebanjiwe, inkosi yakhipha umyalelo wokuthi aboshwe.

Izingane zazibhala izincwadi zemikhonzo zizishutheke ngemifantu ejele ayeboshwe kulona njengophawu lokumkhumbula.

Wagcina ebulewe ngomhla ka-14 kunhlolanja (Febuary)

Esinye sezikhulu zaserome upope Gelasius waqamba lolu suku lomhla zilishumi nane kunhlolanja ngest Valentine’s Day.

Ngakolunye uhlangothi, kukhona imbongi yaserome eyayinenkolelo yokuthi izinyoni zithola izithandwa zazo ezintsha ngalolu suku.

Ngomhla ka-15 kuye unhlolanja kwakuba nomkhosi omkhulu khona kwelamaroma. Abafana babema onqenqemeni baphathe izitswebhu.

Amantshikazane ayedlula egijima eduze konqenqema lolo, efayelwa ngezitswebhu sakuwaqhwitha. Esasimtholile kwakunenkolelo yakhona erome yokuthi unayo inzalo futhi uyoteta ngale kobunzima.

Engifisa ukukwazi-ke wukuthi lolu suku luchazani ezizweni ezimnyama noma umlando walo uthini?

Ngiyabonga.