Ichiefs isale incela izithupha ngomdlali
Uvuselele kwistellenbosch 'obegaqelwe' enaturena
ISALE incela izithupha ikaizer Chiefs umdlali ebimugaqele enquma ukuvuselela inkontileka nestellenbosch FC engenye yamakilabhu adlala ibhola elihle kwidstv Premiership. Ichiefs kuke kwavela ukuthi ifuna uthuli ufawaaz Basadien (27) odlala ophondweni lwesokunxele emuva kwistellies. Kuthiwa ibifuna lo mdlali nje, yingoba izimisele ukuvala isikhala esingase sivuleke njengoba kuvela ukuthi imanqika ukuvuselela inkontileka kasifiso “Chopper” Hlanti (34) ephela uma kusongwa isizini.
Kuthiwa ikhala ngeminyaka yakhe yobudala esihambile. Istellies kuthiwa beyingenankinga nokumudayisa yinqobo nje uma kuzovunyelwana kahle ngemali. Nokho le kilabhu yasewestern Cape inqume ukuqeda ukuqagela ngalo mdlali njengoba ivele yelula inkontileka yakhe ngolwesine. Nakuba ingavezanga ukuthi uyelule ngeminyaka emingaki kodwa ithe yinde.
Ubasadien (27) uthi unqume ukuvuselela nale kilabhu ngoba uzwa sengathi uyayikweleta ngekwenze kuyena. Kuzokhumbuleka ukuthi imutakule edlala kwimoroka Swallows ngo-2022 isimo sibheda njengoba bekubikwa ukuthi izinyoni ziyehluleka ukuholela abadlali.
“Ngizizwa sengathi ngiyayikweleta istellenbosch, yingakho ngenze ukwethembeka kuyona nanokuthi ngisafuna ukukhulisa ibhola lami kuyona. Akhona amakilabhu abengifuna kodwa lokho sekuwumlando manje, kungcono ngingakhulumi ngawo.
“Ngijabule lapha futhi le kilabhu ihamba ngendlela efanele. Kakuzange kube nzima ukuba ngisayine, konke kwenzeke ngentokozo. Le nkontileka ingenza ngizizwe ngiphephile futhi ngintofontofo.
“Okufanele ngiku-lwele manje wukubuyela eqenjini lesizwe ibafana Bafana ngoba yiyona into engiyifisayo,” kusho ubasadien.
Omunye umdlali wale kilabhu naye owelule inkontileka ngusage Stevens ongunozinti. Naye kuthiwa usayine ende kodwa yangadalulwa ubude bayo.