Ipirates kayizikhathazi ngokwenzeka kwidowns
Amasandawana ayincwadi evaliwe njengoba ememezele eyokuphumuza okhilimu babadlali abebekwi-afcon
I-ORLANDO Pirates iveze ukuthi kayizikhathazi nakancane ngokwenzeka ekhempini yemamelodi Sundowns abazobhekana nayo kowedstv Premiership namuhla ngomgqibelo ngo-20h00 eloftus Versfeld Stadium, epitoli.
Kulo mdlalo kulindeleke ukuba uthabiso Monyane (23) odlala ophondweni lwesokudla emuva kwibucs - ashaye ibuya njengoba ubelimele. Uthi bazokhulunyelwa yimisebenzi abazoyikhombisa enkundleni ukuthi yini abafuna ukuyizuza emzuliswaneni wesibili wedstv Premiership.
Umonyane uthi kabazikhathazi ngokuthi isundowns izobophela bani kulo mdlalo njengoba abadlali bayo abaningi bebekwi-africa Cup of Nations (Afcon) esongwe ngesonto eledlule e-ivory Coast. Isundowns ngeledlule ithe izobanika ikhefu abadlali bayo abebekwi-afcon ukuze bakhokhe kahle umoya. Lokhu kwenza abathandi bakanobhutshuzwayo babe nokuqagela ukuthi ngobani abazogijima lo mdlalo kwidowns.
Umonyane uthe: “Sizitshelile singabadlali ukuthi njengoba siya emzuliswaneni wesibili sizokhipha wonke amangwevu. Sizokwenza konke okusemandleni ukuthi siyanqoba. Engingakuqinisekisa wukuthi imisebenzi yethu yiyona ezosikhulumela enkundleni.
“Ngendlela esizilungiselele ngayo ngokweqophelo eliphezulu, ingenza ngingabi nalo uvalo lwanoma ngubani ozokuma phambi kwethu. Noma kanjani abathandi bebhola bazobona into yamehlo kulo mdlalo wethu nesundowns.
“Kasifuni ngisho ukuyifaka emakhanda indaba yokuthi (isundowns) izodlala ngasiphi isikimu njengoba abadlali bayo abaningi bebekwi-afcon, thina sizibhekele okwethu. Konke esizokwenza kulo mdlalo sizokwenzela ikilabhu,” kusho umonyane.
Lo mdlali walimala ngesikhathi le kilabhu ibhekene nomkhaya ikaizer Chiefs koweligi ngolwezi (November) wonyaka odlule. Uze waphuthwa nayithuba lokuba yingxenye yebafana Bafana ebuye nendondo yethusi kwi-afcon ngokulala isithathu.
Uthembinkosi Lorch - osanda kushiya ibucs wajoyina isundowns - uthe ukulungele ukuqala lo mdlalo. Nokho uthe konke kulele kubaqeqeshi ukuthi babophela baphi abadlali. Uthi uyazi ukuthi kuzokuba nzima ukubhekana nabadlali abamazi ukusuka nokuhlala njengoba edlale iminyaka eminingi kwibucs.
Isiyonke imidlalo yedstv Premiership engempelasonto iqhathwe KANJE:NAMUHLA Edobsonville:
Moroka Swallows vs Polokwane City 15h30.
Ebuffalo City: Chippa United vs Cape Town City FC 15h30.
E-athlone: Cape Town Spurs vs Amazulu 17h30.
Epeter Mokaba: Sekhukhune United vs Richards Bay 17h30.
Eloftus Versfeld: Mamelodi Sundowns vs Orlando Pirates 20h00.
KUSASA
Eharry Gwala: Royal AM vs Kaizer Chiefs 15h30.
Embombela: TS Galaxy vs Golden Arrows 17h30.
senzos@ilanganews.co.za