Kumashelwe izinkinga emthonjaneni
Umholi WE-IFP ukhuza ukungabekezelelani kwabezepolitiki
UKHUZE isihlava sokungabekezelelani kosopolitiki umengameli WE-IFP, umnu Velenkosini Hlabisa, obeyingxenye yohambo lokugqugquzela ukuthula emiphakathini yasemthonjaneni.
Uhlabisa ubehambisana namalungu omphakathi nabaholi bemikhakha eyehlukene okubalwa kubona nomnu Mbangiseni Biyela, oyimeya yasemthonjaneni.
Lolu hambo bekuhloswe ngalo ukugqugquzela ukuthula emphakathini nokukhuza umonakalo wezinkinga ezikhungethe imiphakathi yasemthonjaneni, ikakhulukazi elokishini elisanda kuthuthukiswa, ithubalethu.
Kuvele ukuthi leli lokishi likhungethwe yinkinga yokusetshenziswa kwezidakamizwa okunemiphumela eminingi engalungile.
Phakathi kwezinye zezinkinga ezikhona kule ndawo, kubalwa nokwanda kwezigameko zokunukubezwa kwabesifazane nezingane, nokubulawa kwabantu.
Omunye wabaholi bomphakathi uveze ukuthi iningi lalezi zigameko lenzeka uma kuphunywa ezindaweni ezithengisa utshwala ngokungemthetho.
Abebeyingxenye yale mashi bebephethe izingqwembe ezinemibhalo eqwashisa ngezinkinga ezehlukene.
Ethula inkulumo ngemuva kwalolu hambo, uhlabisa uthe: “Ngalolu hambo lwanamuhla sikhuthaza ukuthula ezweni laseningizimu-afrika.
“Sikhuthaza ukuthi kube nokubekezelelana, ikakhulukazi njengoba kuyiwa okhethweni.
“Osopolitiki mabangaphoqi ngenkani uma izimo zingavumi.
“Noma ngabe ufuna ukubeka amabhodi akho, ungaphoqi ngenkani uma kukhona osebekile kuleyo ndawo.
“Nokuzifundisa ukwemukela isimo sinjengoba sinjalo kuyasiza ngoba ngeke ukuphoqe ukungena ezinhliziyweni zabantu ngoba bayalazi iqembu abazolivotela,” kusho uhlabisa.
Imeya yasemthonjaneni ithe umkhandlu unethemba lokuthi zizoncipha izinkinga ezikhona ngemuva kokuba kuqwashiswe umphakathi.
“Sinethemba lokuthi lo mkhankaso uzothela izithelo ezinhle.
“Ngemuva kokuba sibe nalolu hambo nomengameli uhlabisa, uvule ngokusemthethweni indawo yokubhukuda ngenhloso yokuba kusizakale intsha enesifiso sokungena kwezokubhukuda.
“Ukungabi nayo indawo yalolu hlobo bekwenza ukuthi indawo yethu isalele emuva ngezikhathi zemiqhudelwano yemidlalo yomasipala ngoba kunemikhakha esingakwazi ukuba nayo, evela lapha emthonjaneni,” kusho ubiyela.