Uduma Ndlovu ekuqoshweni kowendlovukazi yemvula
UMDIDIYELI nombhali wemidlalo kamabonakude neyeshashalazi obuye abe ngusonkondlo, uduma Kandlovu (osesithombeni), usephakanyiswe njengabanye abazobe behamba phambili ekukhiqizeni umdlalo wempilo yendlovukazi yesizwe samabalobedu, indlovukazi umudjadji.
Ngokusho kwabakwamultichoice, sekuqaliwe ukuqoshwa kwalo mdlalo okulindeleke ukuthi nawo ube nesasasa njengoba kwenzeke emdlalweni, ushaka Ilembe, othakaselwe waphinde wabukwa ngabantu abaningi.
Ngokusho kukanomsa Philiso oyigroup CEO yegeneral Entertainment kwamultichoice, ukuletha umdlalo okhuluma ngendlovukazi umodjadji obuye aziwe ngendlovukazi yemvula (Rain Queen), kuzothokozelwa ngabaningi, ikakhulukazi labo abathandayo ukufunda ngomlando.
Ngokusho kwabesiteshi, lo mdlalo uzokhuluma ngale ndlovukazi ebuse isizwe samalobedu iminyaka ngeminyaka enyakatho yeningizimu Afrika. “Indlovukazi izalelwe ukuphatha isihlalo sobukhosi. Vele inesiphiwo sabangasekho ekhule naso, kanti ukubekwa kwayo kuvusa amakhosi esifazane abekhona ngaphambi kwayo. “Yayaziwa ngokutshela amafu ukuba adedele imvula, kanti ubukhosi bayo bungobuhlonishwayo ngokubeka isizwe sayo kwibalazwe,” kusho uphiliso.
Uthe ukuphumelela komdlalo okhuluma ngenkosi yamazulu, Ilembe eleqa amanye amalembe, ushaka, kukhombisile ukuthi ababukeli bayayilangazelela imidlalo enjengalena, ebafundisayo ngemuva labo.
“Kungezinye zezinto esiziqhenyayo ngazo ukuletha imidlalo engolwimi lwesintu.
“Sisazoqhubeka silethe imidlalo eshiya abantu bekhuluma ngayo futhi bembulelekile ngolwazi nangemvelaphi yabo,” echaza.
Uqinisekisile ukuthi uduma Kandlovu nguyena ozohola ukuqoshwa nokwenziwa kwawo. “Indlovukazi umudjadji ingomunye wabesifazane abahlonishwayo uma kukhulunywa ngezobukhosi kuleli
lizwe. “Kulo mdlalo sizophinde sibheke ukuthi abesifazane asebeke bahlala kulesi sihlalo, bebephila kanjani, yizingqinamba abebebhekana nazo, okubalahlekele nabakuhlomulile.
“Kubalulekile nokuthi umdlalo ungagcini nje ngokunandisa, kodwa uphinde ufundise ngomlando obalulekile walobu bukhosi,” esho.
Uthe mningi umsebenzi osuwenziwe wokuphenya kahle ngomlando, ukukhuluma namakhosi nalabo abanolwazi lomlando walesi sizwe.
Isizwe samalobedu sizinze elimpopo, kanti ubukhosi bakhona kuyaziwa ukuthi buphathwa ngowesifazane kuphela kusukela ngeminyaka yango-1800.
Ulwimi abalukhulumayo lubizwa ngokuthi yikhelobedu. Umlando uveza ukuthi ngonyaka ka-1500 ubukhosi bakwamonimutapa baba nenkinga yokuthi indodana yenkosi nendodakazi yayo, bathandana, bazala ingane kwabe sekuphoqa ukuthi inkosikazi yenkosi ibaleke nendodakazi yayo, babalekela endaweni eseyaziwa ngelimpopo, okuyilapho lobu bukhosi busungulwe khona. Kusukela ngonyaka ka-1800 kakuphindanga kwavumeleka ukuthi lobu bukhosi buphathwe ngabesilisa, kunaloko kuvumeleke ukuthi ubukhosi buthathwe yindodakazi endala.