Izinyembezi zenjabulo ehlonyuliswa ngayebafundisa
Ubebongwa nangokuphakamisa inkandla
UKHALE izinyembezi ebongwa ngesipho ngababengabafundi bakhe, bemhalalisela ngokunqoba Kwazulu-natal, emncintiswaneni wokhozi FM, wothisha abavelele emiphakathini abayakhele.
Uthishanhloko wasebizimali High, enkandla, umnu Ntandoyakhe Ntuli, wehle izinyembezi ngolwesine ngesikhathi ababefunda kulesi sikole bemklomelisa ngo-r11 000, bathengela nesikole izinkomo ezimbili ukuze abungazwe.
Lokhu bakwenze phambi kwezikhulu zokhozi FM nabasakazi balo, abebenabo beklomelisa uthishanhloko ngo-r10 000 nesikole u-r100 000.
Udkt Nqobile Sithole obekhulumela ababefunda ebizimali, uthe umsebenzi owenziwe nguthishanhloko empilweni yabo mkhulu kakhulu. Uthi kuphumelele izifiso zakhe zokwelapha abantu nje, kungenxa kathishomkhulu wakhe.
“Ngesikhathi ngifunda wayefana nobaba, engilandelela ngisho emqashweni ebengihlala kuwona engigqugquzela ukuthi ngelinye ilanga ngibe ngudokotela. Kukhulu akwenze empilweni yethu, ubeyingqwele,” kusho udkt Sithole
Uthe abakwenzele uthishanhloko wabo nesikole kube yinhlanganisela yababefunda khona, abasebenza emikhakheni ehlukene.
Umphathi wezokukhangisa okhozini FM, ulwazi Mthabela, uthi bafikelwe wumbono wokuqhakambisa igalelo lothisha ngenxa yokuthi kukhulu abakwenzayo, njengoba uma kuqala unyaka, kunyakaza umhlaba wonke ngenxa yemiphumela yabafundi esuke ilindiwe.
“Uma kuqala unyaka sigqugquzela ukubuyela kahle ezikoleni, kodwa kulo nyaka sibone ukuthi masihlomulise othisha okuyibona abenza izwe libe nezifundiswa.
“Umphakathi uvotele uthishanhloko wasebizimali njengothisha ohamba phambili esifundazweni, yingakho siwukhozi FM ngokubambisana nabakwavib Mobile, senze lo mkhankaso wokuhlomulisa othisha ngamagalelo abo,” esho.
Kulo mncintiswano esifundazweni impumalanga, kuhlomule uthishanhloko wasecamden Combined, umnu Sipho Sihlali, egauteng nguthishanhloko waselukhanyo High, umnu Bongani Mzelemu, e-eastern Cape nguthishanhloko wasendzondelelo High, umnu Vuyolwethu Qweqwe, Kwazulu-natal ngowasebizimali High, umnu Ntandoyakhe Ntuli, kwathi olale isibili kusona lesi sifundazwe, kwaba ngumnu Mlungisi Bhengu wasesangweni Primary.
Umnu Ntuli ubonge izingwevu zakule ndawo namakhosikazi okwakhiwe kusona isikole, nabangasekho emhlabeni.
Uthi ufike ebizimali eqokelwe ukuphatha ngo-1995. Uthi bekungelula ngoba sasifana nento efile ngaleso sikhathi ngemuva kokuxoshwa kowayephethe.
“Ngesikhathi ngifika kule ndawo bengiwumfana omncane, umphakathi wangemukela, wangeseka kodwa wawungabaza ukuthi ingane encane kangaka izosiphatha kanjani isikole, ekubeni besiphethwe yindoda endala eyaxoshwa ngoba isikole sasifa.
“Ngibonga kakhulu okwenziwe wukhozi FM ngoba kulesi sikhathi esisebenza ngaphansi kwaso, akusekho okujabulisa uthisha ngenxa kahulumeni wethu,” kusho untuli.
Ukhozi FM lube nenguyazana ngokukhethekile kwelinye lamagumbi nabazali, beqeqeshwa ngeqhaza okufanele balibambe ezinganeni.
Imeya yasenkandla umnu Mbhekiseni Biyela income amagalelo kathishanhloko wakulesi sikole. Imuphe isipho sesiklabhu.
“Namhlanje inkandla iphakeme kakhulu ngenxa yakhe. Kuhle ukubongwa komuntu esaphila, yingakho kukhona engikulethile,” kusho ubiyela.