USAZOGQUNYWA ESITOKISINI OSOLWA NGOKUBULALA OWE-IFP
KAKUKHONA okokuqala lithinteka ecaleni lokubulala ibhungu eliyanyaniswa nezinsolo zokubulala umnu Mthokozisi Sithole (36) obengunobhala WEIFP ngaphansi kwesiyingi imbabazane, emtshezi.
Umnu Sithembiso Xulu (22) ubevele enkantolo yemantshi emtshezi izolo ngolwesihlanu.
Bekulindeleke ukuba afake isicelo sokudedelwa ngebheyili, kodwa sahoxiswa ngemuva kokuba ummeli wakhe amthole ngosizo lukahulumeni, eveze ukuthi kuseneminye imininingwane afuna ukuyithola ekilayentini lakhe.
Uxulu utshele inkantolo ukuthi akaqali ukuthinteka ecaleni lokufa komuntu ngesibhamu, kulandela iphutha elamehlela eminyakeni emibili eyedlule, ngesikhathi ephethe isibhamu, okwathi engazelele, kwadubuleka umuntu washona emuva kwalokho, kwasolakala ukuthi nguyena.
Ngaphandle kwenkantolo bekukhona amalungu omndeni, awomphakathi naweqembu, abecula izingoma zomzabalazo
ezisheba ngezaga neziqubulo ezigadla kumbulali kasithole.
Ekhuluma naleli phephandaba umnu Mduduzi Myeza, ongumholi WE-IFP esiyingini imbabazane, ophinde abe yimeya kumasipala Inkosi Langalibalele, uthe ubuholi namalungu eqembu bazoqhubeka nokuhambela kule nkantolo kuze kufikwe esiphethweni salolu daba.
Uthe kabanankinga nomsolwa oboshiwe, kodwa bafuna agonyuluke iqiniso linjengoba linjalo lokuthi wayenobani ebulala
usithole futhi babethunywe ngubani.
“Kuyasishaqisa ukuthi kunabanye abaholi beqembu ikakhulukazi amakhansela, abangakaze bavele lapha ekubeni kulele umholi. Iyakhathaza le nto yokubulawa kwabaholi beqembu lapha emtshezi.
“Umsolwa oboshiwe ngumfana owaziwayo endaweni futhi besingakulindele ukuthi angakhipha isidumbu somuntu ngesibhamu emphakathini,” kuphetha umyeza.