Zinephupho lokukhula izinsizwa ezisebhizinisini lokupheka
Zibonge uxhaso lomasipala wesifunda iking Cetshwayo zivula i-restaurant yesithathu
BASWELE amazwi okubonga, bexhaswa ngemali elinganiselwa ku-r160 000 ngumasipala wesifunda iking Cetshwayo, ukuvula indawo yabo yokudla yesithathu abanikazi bela Fusion Chefs Restaurants, umnu Njabulo Zuma nomnu Richard Ndlanzi.
Lezi zinsizwa ebezivula indawo yazo entsha erichards Bay ngolwesibili, esakhiweni esinekhasino igold Rush Bingo, zithi ukube umasipala kawelulanga isandla, iphupho lazo ngabe kalifezekanga.
Ekhuluma naleli phephdaba uzuma uthe, kuke kwaba nezingqinamba bedinga imali yokuqedelela ukulungisa le ndawo, bengazi ukuthi bazothathani bahlanganise nani.
“Sibe sesixhumana nomnu Thami Ntuli (imeya), sambikela ngezingqinamba esibhekene nazo, wasedlulisela kwabanye abakhona kulo masipala ukuze baselekelele.
“Le ndawo ngeyesithathu ezindaweni esinazo, siphinde futhi sibe nendawo yokulala eyib&b esempangeni,” kusho uzuma.
Lezi zinsizwa ezikufundele ukuba ngochef, zike zabonakala ohlelweni lukamabonakude ithe Ultimate Braai Master, lapho bekuqhudelwana ngokupheka izibiliboco kusetshenziswa umlilo wezinkuni noma amalahle, hhayi izitofu.
Noma zigcine zinganqobanga kulolu hlelo kodwa zingabanye bochef abashisisa umbango kwaze kwaba sekugcineni.
Lezi zinsizwa zinomlando omude emkhakheni wezokupheka njengoba ziqale ukuhlangana e-university of Zululand lapho bezifunda khona, zaphinde zasebenza ndawonye ehhotela elisempangeni, emfolozi Casino.
“Sasithi uma sikhuluma, sibone ukuthi sinombono ofanayo ngebhizinisi lokupheka, sabona kugcono sibambisane ukufezekisa amaphupho ethu.
“Lokhu kusisizile ekutheni sikwazi ukuvula i-restaurant yethu yokuqala enewcastle, lapho ngizalwa khona, okuze kube yimanje isekhona,” kusho uzuma.
Uthi le restaurant ibe isizala
indawo yokudla abayivule ngo2019 ehluhluwe, besebenza ngaphansi kweqakula Safari Lodge, lapho bebephekela khona izivakashi eziphuma ezindazweni ezahlukene kuleli nakwamanye amazwe.
“Ngesikhathi sisasebenza kule ndawo esehluhluwe, sibe sesinxenxwa ngabanikazi bendawo eyi-coffee shop empangeni, bathi banendawo abafisa ukuthi ithathwe yithi.
“Sibe sesivumelana ngokuthi sizoshiya ehluhluwe siye empangeni lapho sivule khona ila Fusion Chefs yesibili.
“Ngonyaka odlule sathenga nendawo eyi-b&b ehambisana nayo le ndawo,” kusho undlanzi ongowokuzalwa emfekayi, emtubatuba.
Bathi ibhizinisi labo liphinde liphekele nemicimbi eyehlukene.
Undlanzi uthi babona indawo erichards Bay, bakhuluma nabanikazi bayo, babanikeza yona, bakhetha ukuyenza i-restaurant yabo yesithathu.
“Into eyenza amabhizinisi ethu akhule wukuthi sisebenza nochef abakufundele ukupheka.
“Siphinde sibaqeqeshe, okwenza kube lula ukuthi sibashiye, baqhubeke nokukhulisa amabhizinisi.
“Siyabonga kakhulu kumasipala ngokusixhasa kuleli phupho,” kusho undlanzi.
Umcimbi wokuvula i-restaurant yabo entsha obungolwesibili bewuhanjelwe nguntuli, yimeya yomasipala umhlathuze umnu Xolani Ngwezi, neyomasipala umfolozi, umnu Xolani Bhengu.
Uzuma nondlanzi bathi ngokuvulwa kwale ndawo sekunabantu abasha abawu-8 ababaqashile.
Bathi banethemba lokuthi bazoqhubeka nokwakhela abantu abasha amathuba emisenzi.
“Ngokwesivumelwano esinaso negoldrush Bingo, njengoba benezindawo ezahlukene, uma senza kahle bazosinika indawo nakwezinye izindawo zabo, sivule khona amanye ama-restaurant.
“Isifiso sethu esikhulu wukuthi sibe nawo nasemadolobheni amakhulu,” kusho uzuma.
Uthi ezindaweni zabo bayafika abafundi nezitshudeni, bezothekela ulwazi ngalo mkhakha
“Kuyaye kudumaze-ke ukubona abenza iziqu zalo mkhakha, abangene kuwona ngoba kunesikhala, bengenalo uthando lwawo.
“Yilokho okuholele ekutheni siqale uhlelo lokuvakashela izikole zamabanga aphezulu, ezenza izifundo zehospitality, ukuhlomisa abafundi ngolwazi futhi sibakhuthaze ukungena kulo mkhakha ngoba benothando lwawo,” kusho uzuma.
Uthi ela Fusion Chefs bazigqaja ngokupheka ukudla okwehla esiphundu, okwenziwa ngaleso sikhathi ukuze amakhasimende akuthole kusesimeni esifanele.
UKUNTENGA KWESIMO SOMNOTHO KUBE NOMTHELELA OMUBI KUBONA
Bathi ukuntenga kwesimo somnotho kube nomthelela omubi nakubona njengoba ukudla sekubiza.
“Kumele uma sibeka intengo yokudla kube yinani elingeke lisenze sibize kakhulu ngoba phela ekugcineni, kunombango wamakhasimende kuzona zonke izindawo zokudla,” kusho undlanzi.
Untuli uthe umasipala ubone uhambo oluhanjwa yilabochef lungolubalulekile njengoba bephinde beyisibonelo nakwenye intsha, ngokuziqalela amabhizinisi ngolwazi lomsebenzi abawufundele.
“Ibhizinisi labo lithuthukisa umnotho endaweni yakithi, liphinde linikeze abantu abasha amathuba omsebenzi.
“Siyaziqhenya kakhulu ngasebekwenzile futhi siyabafisela ukuthi bangabe besabheka emuva,” kusho untuli.
Uphinde wabayala ngokuthi baqhubeke nokusebenza ngokubambisana ukugada imali yebhizinisi, uma kunezingqinamba ababhekana nazo, bangathuli.
“Njengomasipala sinomnyango wakwalocal Economic Development (LED), okulungele ukuthi ubelekelele kunoma yiziphi izingqinamba abazobhekana nazo ebhizinisini ngoba kasifisi ukuzwa kuthiwa behlulekile, sifisa bakhule kakhulu kunakuqala.”
ELA Fusion kuphekwa ukudla okubizwa nge-italian Cuisine, i-african Cuisine ne-english Cuisine.