Izinkinga ezihlangabezana nabesifazane abakhulelwe
Kakumele bazenyeze, mabazi ukuthi banamandla, bazithande futhi bazinakekele
KWABANYE ukukhulelwa kufana nokuzipholela epaki, kwabanye kunjengephupho elesabekayo, abangafisi ngisho nokulikhumbula. Nakuba kunjalo kumele sikhumbule ukuthi lesi yisikhathi esimnandi lapho sisuke sizokwamukela ubuso obusha emndenini.
Kuyiqiniso ukuthi kuyisibusiso ukwanda komndeni, kodwa kungaba nothile ongazizwa kahle ngesikhathi ekhulelwe.
Kokunye lokhu kugula kusuke kubikezela izinkinga ezithile, kanti kokunye kusuke kungamathize thize nje, aziveza ngendlela eyeqile kunokwejwayelekile.
KUNEZINTO ESINGAKHULUMI NGAZO EZENZEKAYO
Kunezinto esingakhulumi ngazo ezenzekayo, okungenza omunye azibuze ukuthi ngabe le nto yenzeka kuyena kuphela yini.
Njengomuntu osebenza kakhulu nabesifazane abakhulelwe, kuke kwenzeke ngithi ngincoma ubuhle kumama ozithwele, akhuze umhlola athi: “Hhayi dokotela, kawungazi, kanginjena mina.”
Ekusho lokhu ngoba eshintshwe wukuthi ukhulelwe, angithi phela lesi sikhathi siza noshintsho ebusweni nasesakhiweni sowesifazane.
* ISIKHUMBA
Kukhona abachachambayo uma bekhulelwe, omunye avelwe yizinduna, abe namabala amnyama ebusweni (phecelezi i-cloasma or melasma).
Kokunye amabala amnyama kawapheleli ebusweni, kepha adlulela nasemzimbeni. Ama
hormone enza izindawo ezinsundu zibe nsundu ngokwedlulele njengezingono, umqala nezitho zangasese.
Uma kuhamba isikhathi umntwana ekhula, kunwebeka isikhumba sibe nama-stretch
marks amanye abe namabala angathi ansundu. Kuyenzeka isikhumba silume kube nokoma okudalwa yiwona ama-hormones okukhulelwa, umuntu azinwaye aze abe midwayidwa.
Ngakho kumele sikhumbule njalo ukuthi abantu kabefani uma bekhulelwe. Kubalulekile ukuthi isikhumba usigcobe futhi ugcobisise uma sikunika le nkinga, ungakhohlwa futhi nokusebenzisa i-sunscreen. Kanti uma kudlulele kumele ukhulume nodokotela wakho.
Singathi wukuba nenhliziyo encane noma wukushesha ukuvukwa wulaka, zonke lezi zinto ziyenzeka kwabakhulelwe.
Ikakhulukazi nge-first trimester, umzimba nomphefumulo uyazwela kakhulu ngalesi sikhathi. Kuba sengathi ungomunye umuntu, okunye ukucabange usudlulile ukuthi bekungafanele ukusho noma ukwenze.
Kubalulekile ukuzigada uma uhlala unomzwangedwa nokudangala, ikakhulukazi uma sekuqala ukuba nomthelela omubi empilweni yakho. Uthole ukuthi kawusathandi ukuhlala nabantu, nokwenza izinto ebezikuthokozisa phambilini.
Lokho kuyobe kuyizinkomba zengcindezi (depression), kudingeka usizo olufanelekile. Khuluma nabasemtholampilo ukuze uthole ukusizakala.
* UKUPHALAZA OKUNGAPHELI
Kukhona okuyisimo sokugula okungamele ukubekezelele. Kulokho kubalwa ukungahlali lutho esiswini futhi kuphelezelana nokuncipha emzimbeni kuze kube nomthelela kuma-electrolyte egazini. Lokhu kudinga ube ngaphansi kwesandla sikadokotela.
Lokhu esikhuluma ngakho yinhliziyo encane, mhlawumbe uhlale ugcwalelwe ngamathe emlonyeni kuthi phalaza, uhlezi unesicanucanu. Linda ukudlula kwi-first trimester, ngoba kuthiwa kuba ngcono emuva kwayo.
Lapha kungcono udle ukudla okomile njengesinkwa esinsundu ungasigcobi, amaqebelengwana amaprovita, amabhiskidi (marie biscuit), uroste ukudla esikhundleni sokudla isitshulu.
Okungamanzi ulokhu ukuphuza kancane, kanjalo nesilinganiso sokudla ungayi ngamawala, ipuleti
ulehlukanise izigaba ezimbili.
Omunye uba nenkinga yokusongelana okuxakile, aze abe namapiles imbala. Jwayela ukudla izithelo, izitshalo nama-cereal anebran, uphuze amanzi ne-rooibos tea kakhulu. Uma unama-piles bonana nodokotela.
* UKUSINDWA KWAMANYONGA
Umzimba wokhulelwe ngaphezu kwama-hormone ajwayelekile uphinde ukhiqize i-relaxin hormone, esuke ilungiselela ukuthi owesifazane akwazi ukubeletha ngokuthi ithambise amalungu asemanyongeni ukuze kube lula uma sekufika isikhathi sokubeletha.
Lokhu kungenza owesifazane azithole engenayo ibhalansi, kube lula ukulimala nokuphaphalaza uma ehamba. Kubalulekile ukuthi uma egoba noma ephakamisa okuthile, enze ngokucophelela.
Yingakho siyaye sikhuthaze ukuthi owesifazane okhulelwe angaqukuli izinto ezisindayo ngoba ibhalansi kayikho esimeni asejwayele, kugcina kulimala amanyonga.
Siyakukhuthaza ukuzivocavoca kodwa hhayi ngamawala, umuntu angenzi njengokwenjwayelo.
* IZINYAWO ZIYAVUVUKALA
Kuyenzeka kube yinto yesikhashana, amanzi ahlale emzimbeni, kungabukeka njengokukhuluphala noma ukuvuvukala.
Kokunye kakubi yinto yesikhashana, ugcina usunezinyawo ezinkulu. Gqoka izicathulo ezivulekile, ujwayele ukuhamba ngokushesha.
Uma emuva kokubeletha isimo sisefana unyawo luselukhulu, yize kunzima kepha yamukela,
uthenge isicathulo esikulinganayo.
* IZINWELE
Komunye ziyakhula zibe zinde futhi zibe ziningi, komunye ziqothuke. Nalapho kusadalwa ngama-hormone ngoba kawaphathani ngendlela efanayo. Kuphela nje kumele unakekele izinwele zakho, uzigcobe ngokufanelekile, zingomi.
* AMAZINYO
Ayazwela kakhulu, kube lula ukopha kwezinsini. Sebenzisa isixubho esithambile, ungaxubhi ngamandla noma ngamawala, uhashaze umlomo njalo.
* MKHULU UMVUZO ONGALE KOKUKHULELWA
Ukukha nje phezulu, umyalezo kwabakhulelwe wukuthi uma ungazizwa kahle, ubona sengathi nguwena wedwa okuleso simo, kufanele wazi ukuthi kakunjalo, bakhona nabanye ababhekene naso. Khumbula ukuthi kungokwesikhashana, umvuzo ongale mkhulu.
Umzimba wakho wenza okuyisimanga, okuwukuthwala umuntu ophelele izinyanga eziwu-9, ube uzinakekela nawe uqobo, ushintsho olukhona lungakujivazi. Ungowesifazane onamandla, zithande futhi uzinakekele.
Udkt Sibu Lubelwana utholakala: Ebusamed Hillcrest Private Hospital (031 768 8142) Ecato Ridge Hibiscus Hospital (031 492 8062) Website ww.drsibuobgyn.co.za Email: info@drsibuobgyn.co.ca