Utholwe emsulwa oweda obesolwa ngenkohlakalo
I-DA ikhala ngokumoshwa kwemali yomphakathi kuphenywa
USIHLALO weda Kwazulu-natal, umnu Dean Macpherson, uthi kuyamangaza ukuthi uhulumeni uze wachitha imali uphenya ngenkohlakalo ‘engekho’, ngemuva kokusabalala kwezindaba zokuthi imeya kamasipala umngeni, umnu Chris Pappas, isolwa ngokunikezela ngoxhaso kowesilisa osondelene nayo.
Phambilini umnyango wezokubusa ngokubambisana nezomdabu Kwazulu-natal, oholwa ngunkk Bongiwe Sithole-moloi, waveza ukuthi uzolusukumela phezulu lolu daba.
Umnyango wabhalela imenenja yalo masipala, njengoba kuleli sonto uveze ukuthi ngokophenyo lwawo, uthole ukuthi izinsolo ebezibhekiswe kupappas kazinabo ubufakazi.
“Ngemuva kokusabalala kwezinsolo zenkohlakalo, sacela imininingwane kumasipala, sayithola, sayicubungula – sathola ukuthi kayikho inkohlakalo eyenziwe.
“Esikutholile nesinesifiso sokuba kulungiswe wukungabi khona kwemithetho nemigudu yangaphakathi yokuxhasa ngemali izinkampani ezisemkhakheni wezokuvakasha,” kusho unkk Sithole-moloi.
Umacpherson uthe lawa mahlebezi angekho ngopappas, asuswa ngabeqembu elibusayo I-ANC.
“Njengeqembu, besingenakho ukwesaba; sihlale sisho ukuthi lapho siphethe khona sisebenza ngokuthembeka.
“Sisaqhubeka nokukusho lokho futhi siyawemukela umbiko walo mnyango. Sisamethemba upappas, ophinde waqokwa njengalowo ozomela leli qembu kwesikandunankulu wesifundazwe,” kusho umacpherson.
Uthe yize bekujabulela ukuthi imeya yabo itholwe imsulwa, kodwa bayakhala ngokumoshwa kwemali yomphakathi “ngento engekho”.
“Lena kwakuvele kuyindlela yenhlangano ebusayo yokuzama ukuthola amaphoyinti.
“Sinethemba lokuthi izosebenzisa le miphumela ukuzinuka amakhwapha, bese ibheka inkohlakalo komasipala abanganyelwe yiyo, ikakhulukazi itheku nomsunduzi, osuguqe ngamadolo.
“Lo mphumela usifundisa ukuthi noma izinsolo, kubalulekile ukuba kuhlukaniseke phakathi kwezinsolo zangempela nezinsolo ezingenayo into ephathekayo.”