UMLINGISI OQAVILE ULAXAZE UZALO
UMLINGISI oqavile ulaxaze umdlalo Uzalo singakapheli nesikhathi esingangonyaka ewujoyinile ngenxa yokunga-gculiseki ngempatho abeyithola kwabanye ozakwabo.
ILANGA Lempelasonto lithole ngemithombo yalo ukuthi usibu Jili odlala indawo kanomkhosi Mhlongo, ukhethe ukunqamula inkontileka yakhe.
Umthombo wokuqala uthe usibu (osesithombeni) ubehlale ekhala ngokungenami nangokuphatheka kabi kulo mdlalo. “Ubesebenza amahora angaphezulu kunalawo abewalindele, nempatho ubehlale ekhala ngayo njengoba ethi abanye ozakwabo okubalwa kubona nabaqondisi, bebemphethe kabi,” kusho umthombo.
Omunye umthombo uthe akusiyena usibu olaxaze lo mdlalo, kodwa yiwona omkhombe indlela njengoba bekunezikhulu zawo ebezingeneme ngaye.
“Ngokwazi kwami, yena ubesazimisele ukuqhubeka nokusebenza, izikhulu zakhetha ukuyinqamula inkontileka yakhe ngoba indawo yakhe beyingasenawo umthelela emdlalweni,” kusho umthombo.
Imibiko engaqinisekiswanga iveze ukuthi esinye sezizathu eziholele ekutheni lo mdlalo unqamule inkontileka yalo mlingisi, wukuthi uzithwele.
Ethintwa usibu, ukuqinisekisile ukuthi nguyena okhethe ukuwushiya lo mdlalo ngenxa yokungagculiseki ngezinto ezithile angathandanga ukuzidalula.
Uthe ukhethe ukuthatha ikhefu ngenxa yokuthi kuningi abebhekene nakho ngesikhathi eqopha Uzalo.
“Kuningi umuntu abehlangabezana nakho, bese kungaphezulu, yingakho ngikhethe ukuthi ngithi ukuma kuwona,” kusho yena.
Ebuzwa ngokuzithwala okuthiwa uxoshelwe khona, uqale ngokuhleka ngaphambi kokuthi ayichithe le mibiko.
“Kanjani nje, ngikahle kakhulu ngalezi zingane enginazo,” esho.
Uthe okwamanje usazothi ukuma kancane kulo mkhakha njengoba enezinhlelo zokuthi asebenze ngemuva ekukhiqizeni imidlalo kamabonakude.
“Okwamanje ngisazophumula bese ngithatha isinqumo ngokuhamba kwesikhathi,” esho.
Leli phephandaba liphinde lahabula nokuthi omunye oshiyayo kulo mdlalo, nguthembi Nyandeni odlala indawo kanjinji.
Kuthiwa inkontileka yakhe kayivuselelwanga njengoba kuqala isizini entsha yalo mdlalo.
Ngokwesitatimende esikhishwe yilo mdlalo, kulindeleke ukuthi kuqale kubonakale abalingisi abasha kuwona njengoba izolo ngolwesihlanu kuqale isizini yeshumi.
Phakathi kwabalingisi abalindelekile, kubalwa untando Mncube, ulinda Sibiya, umnqobi Kunene, ubandile Maphalala, uvusi Mdiniso, ulungani Mabaso nofaith Mgobhozi.