Ezemfundo nemizamo kwabangasebenzi
Bazoqeqeshwa kabusha othisha ukuze baqasheke kalula
UMNYANGO wezemfundo Kwazulunatal, usuqhamuke nohlelo olusha lokulekelela othisha abangaqashiwe, oluzoba wunyaka owodwa, lokuqeqesha abafundele izifundo ezingekho eqhulwini kwezidingekayo ukuze bathole umsebenzi kalula.
Udkt David Chonco womnyango wezemfundo Kwazulu-natal, ukusho lokhu emcimbini wokuvulwa ngokusemthethweni kwesikole esisha, inkosi Zenzo Primary, Kwamadlebe, empangeni ngolwesithathu.
Uthi kubhungwa ngohlelo oluzokwethulwa, oluzovumela othisha ukuba baqeqeshwe unyaka owodwa ukuze baguqukele kwezinye izifundo ezithathwa njengezibalulekile abangazifundisa. Bawu-51 000 othisha athi kabaqashiwe kwidatabase yomnyango.
“Baningi othisha abangasebenzi ngenxa yokuthi izifundo abakhetha ukuzifundisa, akusizona ezidingeka kakhulu. Abanye baqeqeshelwe ukufundisa isizulu nelife Orientation, mhlambe izikhala esinazo zifuna othisha besayensi nemaths.
“Inkinga esibhekene nayo ngeyokuthi othisha abaningi kabanazo izifundo esizifunayo,” kusho udkt Chonco.
Ngokombiko womnyango wezemfundo wanyakenye kulwezi (November), ziwu-3 198 izikhala ezingagcwalisiwe esifundazweni.
Ngokombiko obekwe etafuleni yinhloko yomnyango wezemfundo umnu Nathi Ngcobo nongqongqoshe wonyango unkk Mbali Fraizer, emalungwini esishayamthetho, siqengqeleza phambili isifunda umlazi, ethekwini ngokushoda kothisha.
Izikhala zothishanhloko ziwu685 esifundazweni, ezamasekela othishanhloko ziwu-389, ezezinhloko zeminyango zemikhakha ehlukene ngaphakathi ezikoleni ziwu-1215, ezothisha abafundisayo ziwu-909.
Ukushoda kwemali nemibango yezikhundla nakho bathi kunomthelela ogqozisa ukuqashwa kothisha ngokugcwele. Udkt Imran Keeka obhekelele ezemfundo esishayamthetho ngaphansi kwedemocratic Alliance (DA), uthi kuyethusa okwenzeka kulesi sifundazwe.
Uthe umonakalo ukhombisa ngokusobala ukuthi kayiqinisekiswa imfundo esezingeni eliphezulu kulesi sifundazwe nakuhulumeni.
“Abafundi abaningi emakilasini nokungabi bikho kothisha abanele, kudala izinkinga, ikakhulukazi uma bengaqashiwe ngokugcwele othishanhloko ababambile ezikhundleni abakuzona.
“Lokho kwenza ukuba lungabi bikho uzinzo esikoleni futhi bengabi nawo amandla okushaya umthetho,” kusho udkt Imran.
Uthi ezikhaleni zothishanhloko, kukhona asebebanjiswe kuzona isikhathi eside, bengaqashwa ngokugcwele.
Utshele ILANGA Lempelasonto ukuthi konke lokho kubenza bazizwe benovalo othisha ngokuthi mhlawumbe abakulungele ukuqashwa ngokugcwele kulezo zikhala.
Esifundeni umlazi, kufuneka othisha abawu-445 abazofundisa, othishanhloko bawu-9, amasekela abo awu-8, nezinhloko zeminyango eziwu-21.
Kulandela isifunda ipinetown, okushoda othisha abawu-331, uma sekuhlanganiswe nabasezikhundleni kwenza u-353.
Kulandela isifunda izululand okufuneka othisha abawu-247, uma sekuhlanganiswe nabasezikhundleni kwenza u-259.
Ngokombiko womnyango wezemfundo Kwazulu-natal, kulo nyaka ofile zivaliwe izikhala eziwu-2 753, lezi zikhala ezivulekile ezakulo nyaka.
I-DA ithi lezi zikhala ezivaliwe kazigculisi uma kuqhathaniswa nesimo okubhekenwe naso njengamanje sokushoda kothisha. Ithi bangaphezulu kuka-1 800 othisha abahleli emakhaya neziqu. mthobisis@ilanganews.co.za www.ilanganews.