UMOTSEPE UXHASE IZITSHUDENI NGEMALI YOKUBHALISA EMANYUVESI
UQAQE izihibe ebezivimbe izitshudeni ukuba zibhalise emanyuvesi ngenxa yezikweletu umnu Patrice Motsepe, ongenelele ngoxhaso lwemali engango-r30 million, enikezwe abaholi bezitshudeni.
Ngesonto eledlule uhlangane nabo bonke omengameli bezitshudeni istudent Representative Council (SRC) esandton Convention Centre, ukuzwa izinkinga zemali ezibhekene nabafundi.
Lokhu ukwenze ngaphansi kwemotsepe Foundation. Omengameli bamanyuvesi awu-26 akuleli, bebeyingxenye yale nguyazana.
Umnu Motsepe uthe lo mnikelo uzogxila ohlelweni lokubhalisa kwabafundi abavinjwe yizikweletu okufanele baziphungule ngaphambi kokuba bavumeleke ukubhalisa.
Uthi kuwumsebenzi wesizwe ukucaba indlela yabanye abantu uma bevimbekile kuyona.
Unxuse abaholi bezitshudeni ukuba le mali isetshenziswe ngendlela efanele.
“Masikhuthazeni bonke abaxakekile ukuba bazibambe ziqine ngokuthi sibalekelele. Imfundo ibaluleke kithina sonke, yingakho kufanele kubanjiswane kuyona, futhi nabaholi bezitshudeni basebenze ngokuzikhandla,” kusho umnu Motsepe.
Inyuvesi ngayinye ithole imali esukela ku-r1,100 000 kuya phezulu. Umkhandlu wezitshudeni zaseuniversity of Cape town, uthe le mali uzolekelela ngayo izitshudeni okungezona ezakuleli.
Umengameli womkhandlu wakule nyuvesi, umnu Hlamulo Khorombi, uthi bafinyelele kulesi sinqumo ngenxa yokuthi lezi zitshudeni kazihlomuli lutho kuleli.
“Umsebenzi wethu njengomkhandlu wezitshudeni wukuthi sizenze zonke zifane. Sizobheka ukuthi abathola umhlomulo, bawuthola ngaphansi kwaziphi izimo, futhi lokho sizokumemezela esidlangaleni.
“Imfundo kufanele kube ngeyethu sonke esikhungweni, kungabi bikho abashayekayo,” esho.
Umphathi wakulesi sikhungo, usolwazi Daya Reddy, uthi le mali izolekelela kakhulu ezitshudenini ezixakekile
“Lo mnikelo usho olukhulu kubantwana bethu emfundweni yabo,” esho.
Izitshudeni eziningi zisaphazamisekile ekubhaliseni, okwenze kwabhikishwa kwezinye izikhungo emasontweni amabili adlule.
Okususe uhlevane wukugqoza kwesikhwama inational Student Financial Aid Scheme (NSFAS) ekuphenduleni izicelo zezitshudeni, kanti ezinye zisafake izicelo zokubuyekezwa kwesinqumo salesi sikhwama, sokuchithwa kwezicelo zazo.