Siphazamise izinhlelo zikamasipala isiteleka sezisebenzi
Ithimba lezokuqondiswa kobugwegwe lizobhekana nabateleka ‘ngokungemthetho’
KUYAQHUBEKA ukuphazamiseka kwamasevisi omphakathi owakhele umasipala wetheku ngenxa yesiteleka sezisebenzi ezibhekele ukuhlanzwa kwedolobha namapaki, ngaphansi kophiko idurban Solid Waste (DSW) nolwecleanising and Solid Waste (CSW), esingenele osukwini lwesine izolo nolwesihlanu.
Ngolwesine umasipala wetheku ukhiphe isitatimende esazisa izakhamizi ngokuphazamiseka kwezinye zezidingo zomphakathi, ezifana nokuthuthwa kwemfucuza, ukuhlinzekwa ngamanzi nokusebenza kweminye yemitholampilo.
Kuthiwa lesi siteleka siqale ngemuva komhlangano wenyunyana yezisebenzi zikamasipala, i-south African Municipal Workers Union (Samwu), obungolwesibili enkundleni icurries Fountain, ethekwini.
Kulo mhlangano kubikwa ukuthi abaholi bakhale “ngokuxhashazwa” kwezisebenzi ngokuholelwa imali encane uma iqhathaniswa naleyo eholwa ngozakwabo abakwabanye omasipala bamadolobha amakhulu.
Ngemuva kwalo mhlangano izisebenzi zigcwale imigwaqo emikhulu yetheku, zayivala ngemigqomo kadoti nemfucuza, nangezimoto zikamasipala.
Umasipala uxuse izakhamizi ukuba zibekezele, kuze kudlule lesi simo.
“Umasipala udlulisa ukuxolisa kuzona zonke iziguli ezisebenzisa imitholampilo iprince Cyril Zulu, owaseverulum, Ottawa nowaseredhill ngokuphazamiseka kokusebenza ngenxa yesiteleka esingekho emthethweni esiqalwe ngazinye zezisebenzi.
“Ukusebenza kwale mitholampilo kuzoqhubeka uma sekubonakala ukuthi umphakathi nezisebenzi zayo ziphephile.
“Izakhamizi ziyacelwa ukuba zingawukhiphi udoti njengoba kusenokuphazamiseka kokuqoqwa kwawo,” kusho umasipala esitatimendeni.
Lo masipala uphinde wasongela izisebenzi eziyingxenye yesiteleka ngokuthi uzozithathela izinyathelo zomthetho.
Umkhulumeli walo masipala unkz Gugu Sisilana uthi umasipala ukhathazekile ngoba kazikho izikhalo ezibhalwe phansi, ezalethwa yilezi zisebenzi ezitelekile.
Uthi bekumele zilandele imigudu efanele uma zinganelisekile ngendlela yokusebenza.
“Umthetho wala ekhaya ngaphansi kwakadsw uthi, ongasebenzanga akaholi, nakulaba-ke kuzoba njalo ngoba abakwenzayo kakukho emthethweni.
“Ithimba lezokuqondiswa kobugwegwe lizobhekana nabathintekayo.
“Sizibophezele ukuxazulula izinkinga zezisebenzi ngokuxoxisana nazo.
“Siyethemba amaphoyisa azosebenza ngokuzikhandla ukunqanda lobu budlova,” esho.
Nakuba lesi siteleka besisaqhubeka izolo, ngolwesine inkantolo enkulu yasethekwini ikhiphe umyalelo wokuthi kasikho emthethweni, nokuthi izisebenzi eziyingxenye yaso zithathelwe izinyathelo ezifanele.