Uthembisa indumiso kwi-albhamu ayiqophayo
Uziyanda uthi wayegxuma ahlale uma ecelwa ukulingisa ubrenda Fassie
UMZWILILI womculo wokholo uziyanda Mazibuko, uthi ubengazi ukuthi ukukhulela ekhaya elithanda umculo kumqeqeshela ikusasa njengoba esengumculi.
Ekhuluma naleli phephandaba, uthe ukhulele emndenini okhonza eweseli futhi bebezifela ngokucula.
“Siwumndeni okuthandayo ukucula, sikhule sikhonza eweseli. Ngaleso sikhathi ngangicelwa ukuba ngilingise ubrenda Fassie (ongasekho) nami ngokuphapha, ngisukume ngintaza, kanti ekugcineni ngizothola ithuba lokwabelana nabantu ngephimbo lami,” esho.
Uthi ukucula kuyena kakusikho okokunandisa nje kuphela, kepha yindlela yokushumayela izwi likankulunkulu. Uqede cishe iminyaka ewu-20 eyingxenye yabahola ibandla kwindumiso.
“Bengike ngiqashwe nasemicimbini ehlukene ngiyocula khona. Kukhona konke, isifiso sami besilokhu simile ekutheni ngifisa ukuqopha ngolunye usuku. Bengilokhu ngizama kanti ujehova uzogcina engizwile,” kusho uziyanda oveze ukuthi uthando lomculo lukhule kakhulu ngesikhathi esesindisiwe.
Uthi uyakholelwa ekubhaleni amaculo okudumisa asuka ngaphakathi kuyena.
“Enkonzweni umfundisi ubejwayele ukugqugquzela ukuba sizibhalele amaculo, singalokhu sicula awabanye.
“Ngagcina sengingumuntu obhala izingoma, ngizibeke. Ngibhala into engisuke ngiyithunywe wumoya ongcwele ngaleso sikhathi,” esho.
Njengamanje le ntokazi seyikhonza erehoboth Worship Centre. Uziyanda ubeyingxenye yekhonsathi ikings and Queens of Gospel ngonyaka owedlule, ethe Playhouse, ethekwini.
Echaza ngengoma yakhe esihloko sithi, ‘Idwala’, ephume ngonyaka owedlule, uthi ichaza ngohambo lwakhe nonkulunkulu.
“Ngimbonile ehamba nami enginqobela, engitshengisa nothando endleleni. Izwi lithi ujehova uyidwala, omi kuye akanakuzanyazanyiswa,” esho.
Kulo nyaka uthi ukhulekela ukuba kuhlangane imali ukuze akwazi ukuqedela i-albhamu esinezingoma eziyisihlanu aziphekile.
“Le albhamu izokube iboshelwe ngezingoma engizibhalile nezinye ezivela kumahubo. Abantu mabalindele indumiso yodwa. Kulesi sikhathi sanamuhla siyakudinga kakhulu ukusondela kunkulunkulu kukuhle noma kukubi,” kuphetha uziyanda.
tzondi@ ilanganews.
co.za