Udunyazwa wukuba yingxenye 'yezahluleki' owechiefs
Okhule ejabulela izicoco zamakhosi, akasazinqobi njengoba esegijima ezimpofaneni
UDUNYAZWA wukwehluleka ukuhamba ezinyathelweni zezingwazi zekaizer Chiefs ezazimjabulisa ngokunqobela abalandeli bale kilabhu izicoco ubruce Bvuma ongunozinti wabafana basephefeni. Abadlali bale kilabhu bazwisa ubuhlungu abathandi bechiefs njengoba kuzophela iminyaka ewu-9 golokogo kule sizini behluleka ukubajabulisa ngokubanqobela isicoco kwezidlalelwa kwipremier Soccer League (PSL). Udillan Solomons (27) olihlikihla esiswini kwichiefs utshele
ILANGA Lempelasonto
ukuthi nabo kakubaphathi kahle ukuba yingxenye yabadlali abanomlando wokwehluleka ukunqobela le kilabhu izicoco, okuyinto ebidume ngayo phambilini.
Phela selokhu yasungulwa le kilabhu ngo-1970 ibiziwolela nje izicoco kwaze kwashintsha ukudla epuletini ngemuva kwesizini ka-2014/2015.
Omunye umdlali ozwakalise ukuphoxeka ngosizi abalulethela le kilabhu ngubvuma, othe ukhule engumlandeli wokuqina wechiefs, futhi ejatshuliswa wukuthi ibihlale iqukula izinkomishi. Uthi kuyamdumaza ukuthi uma sekunguyena osegijima kule kilabhu, sebeyahluleka ukuqhubeka nokwakwenziwa ngabadlali bakudala.
Ichiefs izokwamukela imoroka Swallows emdlalweni wedstv Premiership ozokuba namuhla ngomgqibelo ngo-17h45 EFNB Stadium, egoli.
Usolomons unxuse abalandeli bale kilabhu ukuqhubeka nokubeseka ngokuza emidlalweni.
“Sizozama ngokuphindiwe ukujika izinto kusuka emdlalweni wethu neswallows.
“Lo mdlalo uzokuba nzima, ngeke siwuthathe kancane. Kusemahlombe ethu ukubuyisa izinsuku zenjabulo kubalandeli. Siyavuma ukuthi sibaphoxile abalandeli, sicela uxolo,” kusho usolomons.
Ukhuluma eyokuphoxa abalandeli lo mdlali nje, yingoba ichiefs iwashiswe ijezi yimilford FC kwilast 32 yenedbank Cup sekukhahlelwa amaphenathi ngeledlule egoli.
Imilford idlala esigabeni esiphansi kunesechiefs.